Իսրայելի Քնեսեթի խոսնակ Յուլի Էդելշտեյնը խորհրդարանին է ներկայացրել Հայոց ցեղասպանությունը պաշտոնապես ճանաչելու մասին օրենք: Օրինագիծը նախնական հաստատվել է, բայց դեռևս պետք է կառավարության վավերացումը: Իր ելույթում Էդելշտեյնը ասել է, որ եկել է ժամանակը, որպեսզի Իսրայելը միանա հայերի ցեղասպանությունը ճանաչած 28 երկրներին: Բացի այդ նա քննադատել է իր այն գործընկերներին, որոնք այս քայլին աջակցում են բացառապես որպես դիվանագիտական պատասխան՝ Թուրքիայի հակաիսրայելական քաղաքականությանը:
«Պետք է խոստովանեմ, որ ինքս այս կապակցությամբ խառը զգացումներ ունեմ: Մի կողմից՝ վաղուց ժամանակն է: Ես տարիներ շարունակ Իսրայելին կոչ եմ արել կատարել իր բարոյական պարտքը: Ավելի քան 1.5 միլիոն հայ անխղճորեն սպանվել է կարճ ժամանակի ընթացքում… Ես միևնույն ժամանակ ամաչում եմ: Գիտեմ, որ իմ օրենսդիր գործընկերներից ոմանք բացահայտ հայտարարում են, որ Հայոց ցեղասպանության ճանաչումը կլինի սիոնիստական ճիշտ պատասխան Թուրքիայի խորշելի պահվածքին, որն անցած շաբաթ արձագանքեց Գազայի հետ հատվածի գործողություններին: Ինձ համար դժվար է հասկանալ այդ դիրքորոշումը. այդ երբվանի՞ց է Անկարայով պայմանավորված մեր որոշումները էթիկայի ոլորտում: Մի՞թե մեր հարաբերությունների բնույթն այնպիսի մարդու հետ, ինչպիսին Էրդողանն է, կարող է փոխել պատմությունը:
Ինձ համեմատությունները չեն հետաքրքրում, կարծում եմ ավելի լավ կլինի չօգտագործել «Շոա» տերմինը՝ հայերի ցեղասպանությունը քննարկելիս: Բայց միայն մտածեք՝ մեզ դուր կգա՞ր, եթե Հոլոքոստի ճանաչումը կախված լիներ դիվանագիտական հարթակում իրադարձություններից: Եթե բախվեինք նման վերաբերմունքի, նույն պահին արդարորեն այն կորակեինք որպես ոչ բարոյական»,-ասել է Քնեսեթի խոսնակն իր ելույթում:
Պատրաստեց՝ ՎԻԿՏՈՐՅԱ ԱՆԴՐԵԱՍՅԱՆԸ
