Շուրջ 100 հեծանվորդներ այսօր վաղ առավոտյան «Հանրապետության» հրապարակից տոնական երթ սկսեցին դեպի Սարդարապատ: Նախաձեռնության հեղինակը սիրողական հեծանվասպորտի եւ սպորտային տուրիզմի ֆեդերացիան է, որի հիմնադիր նախագահ Արման Անտոնյանը Aravot.am-ին ասաց. «Մեր ֆեդերացիան մշտապես մասնակցում է համապետական բոլոր տոներին: Այս օրն էլ բացառություն չէ, եւ մենք մայիսյան հերոսամարտերի 100-ամյակին նվիրված «Հանրապետության» հրապարակից տոնական շքերթով մեկնում ենք Սարդարապատ: Նպատակը առողջ ապրելակերպի քարոզչությանը նոր շունչ հաղորդելն է եւ մեր մասնակցությամբ այս տոնակատարության մասնիկը դառնալն է:
Երթին մասնակցում են տարբեր տարիքի ու զբաղմունքի տեր մարդիկ: Մեր նմանատիպ նախաձեռնություններում տարիքային սահմանափակում չկա: Կարեւորը հոգով երիտասարդ լինելն է: Պարտադիր չէ, որ երթի մասնակիցները մեր ֆեդերացիայի անդամ լինեն: Ով սիրում է հեծանիվը եւ ակտիվ հանգիստը մեզ համար յուրային է: Շուրջ 60 կմ տարածությունը որոշ դադարներով նախատեսում ենք հաղթահարել երկու ժամում, գուցե, մի փոքր ավելի: Սարդարապատում կմասնակցենք տոնակատարությանը եւ երեկոյան ավելի ուշ ժամի կվերադառնանք Երեւան: Ի դեպ, ճանապարհին մեզ միանալու են նաեւ այլ հեծանվորդներ»:
Աշոտ ՀԱԿՈԲՅԱՆ
