Գինու հետ մատուցվող հրաշալի նախուտեստ է՝ հեշտ պատրաստվող, համեղ եւ հարմար`մատուցելու համար:
Անհրաժեշտ մթերքները
Շերտավոր խմոր- 500 գրամ
Կաթնաշոռ-200 գրամ
Պանիր- 200 գրամ
Ձու- 2 հատ
Չորացրած կանաչիներ (հազրեվարդ (розмарин), ուրց, անանուխ կամ որեւէ այլ հոտավետ կանաչի, ես օգտագործում եմ «պրովանսային խոտաբույսեր» կոչվող փունջը, որը պատրաստի վիճակում վաճառում են երեւանյան սուպերմարկետներում)- 1 թեյի գդալ
Թարմ սպանախ եւ կանաչ սոխ- ամենքից մի քանի ճյուղ (պարտադիր չէ)
Սեւ ու կարմիր պղպեղ- ըստ ճաշակի
Քունջութ- 1 ճաշի գդալ
Պատրաստման եղանակը
Պանիրը (կարող եք վերցնել ցանկացած պինդ կամ կիսապինդ պանիր` մեր լոռիից ու չանախից սկսած` սուլուգունիով, հոլանդական պանրով կամ մոցառելով վերջացրած, կարող եք վերցնել մի քանի տեսակի պանիրներ` ձեր ճաշակով) քերիչով անցկացրեք, ավելացրեք կաթնաշոռը, մեկ ձուն եւ մյուս ձվի սպիտակուցը (դեղնուցը լցրեք փոքրիկ ամանի մեջ եւ դրեք մի կողմ` կարկանդակների վրա քսելու համար), համեմունքները, լավ խառնեք: Եթե սպանախ կամ այլ կանաչեղեն եք ավելացնելու, լավ լվացեք, շատ լավ չորացրեք եւ մանր կտրատեք ու խառնեք միջուկին:
Շերտավոր խմորը բացեք, կտրատեք փոքրիկ քառակուսի կտորների: Պանրի միջուկից մեկական թեյի գդալ դրեք յուրաքանչյուր քառակուսու վրա, ծալեք երկու մասի, որ ստացվեն լցոնված եռանկյուններ: Ձեռքով սեղմեք, որ տափակի: Շարեք տապակի վրա: Ձվի դեղնուցին ավելացրեք մեկ թեյի գդալ ջուր կամ կաթ, լավ խառնեք եւ վրձինով քսեք կարկանդակների վրա: Վրան քունջութ ցանեք եւ դրեք 220 աստիճան տաքացրած ջեռոցը` մինչեւ կարմրի:
Մատուցեք տաք-տաք, բայց նկատի ունեցեք, որ սառը վիճակում էլ է շատ համեղ:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
