Հայ-ռուսական համալսարանի ռեկտոր Արմեն Դարբինյանը համաձայն չէ ՀՀ կրթության եւ գիտության նախարար Արայիկ Հարությունյանի` կրթությունն անվճար դարձնելու ցանկություն-հայտարարության հետ: Այսօր` «Թումո» կենտրոնում կազմակերպված «Նոր սերնդի կրթությունը հարթակի ձեւավորումը 1-ին քայլ» միջոցառման ժամանակ Արմեն Դարբինյանն ասաց` նախարարի ասածին հնարավոր կլինի հասնել հարուստ բյուջեի եւ հարուստ հասարակության պարագայում: Իսկ այժմ, փուլն այլ է, հակառակը, վճարովի ծառայություններով պետք է հնարավորություն տանք բուհերին գումար վաստակել եւ այն դնել ի բարօրություն բուհի եւ ՀՀ տնտեսության:
Նախարարի հետ նաեւ համաձայն է`առաջին խնդիրը բուհերի ապաքաղաքականացումն է: Կարծում է, Հայաստանում գործող միջազգային բուհերը`Հայ-ռուսական համալսարանը, Ֆրանսիական, Ամերիկյան համալսարանները կարողացել են այդ խնդիրը հիմնականում լուծել: Նաեւ կարծում է, որ մեծ ուշադրություն պետք է դարձնել գիտությանը, ինչը մի տեսակ անտեսված է համալսարաններում, մինչդեռ համալսարանների զարգացման լավագույն գործոնն է:
«Գիտության մեջ հրաշալի երիտասարդներ ունենք, 30-40 տարեկան, պետք է նրանց վրա հիմնվել, նրանց ներգրավել համալսարանական գիտակրթական համակարգ»,- ասաց Արմեն Դարբինյանը` հավելելով, որ կարեւոր է համարում նաեւ երկրի համալսարանական գիտակրթական համակարգի միասնական լինելը: Ասում է`դա հնարավորություն կտա բուհերի նյութատեխնիկական բազան, գրադարանները դնել ի նպաստ ուսանողների:
Հայ-ռուսական համալսարանը մեկ տարի առաջ հայտարարել է, որ բացում են դռները: Իրենց կոչին ոչ ոք չի արձագանքել: Արմեն Դարբինյանը նախարարին հորդորեց. «Էդ ցուցումը տվեք`թող բացվեն»: Նա նախարարին հորդորեց նաեւ`բուհերին հնարավորություն տալ մասնագիտությունների «բացման» համար: Դա կատարվում է կառավարության որոշմամբ, ինչը ժամանակ է պահանջում եւ հնարավորություն չի տալիս ժամանակին համընթաց ու արագ քայլել:
Նելլի ԳՐԻԳՈՐՅԱՆ
