Դիլիջանում լրագրողների հետ զրույցում այսօր ՀՀ նորընտիր վարչապետ Նիկոլ Փաշինյանը չմեկնաբանեց հարցը, թե իր դիտարկմամբ՝ ԱԱԾ-ի բացահայտած կոռուպցիոն շղթաները նախորդ իշխանության իմացությամբ եւ թողտվությա՞մբ են կատարվել, թե ոչ: «Չեմ մեկնաբանի, որովհետեւ դա կարող է դիտվել որպես նախաքննության վրա ազդելու փորձ: նախաքննությունը կտա հարցերի պատասխանները: Կարծում եմ՝ որեւէ մեկը չի կասկածի, որ նախաքննության համար բոլոր անհրաժեշտ պայմանները ստեղծված են»,-նկատեց Նիկոլ Փաշինյանը:
Հիշեցնենք, որ օրերս ԱԱԾ-ն հայտնաբերել է հարկերը թաքցնող կոռուպցիոն շղթա: Լրագրողները հետաքրքրվեցին՝ իսկ եթե, օրինակ, նախկին վարչապետ Սերժ Սարգսյանի հարցաքննության կարիքը լինի՞:
Փաշինյանը պատասխանեց, որ անձի հարցաքննությունն օրենքով է սահմանված եւ որեւէ մեկի կամքով չէ: «Ես չեմ որոշում՝ ո՞վ հարցաքննվի, եւ ո՞վ՝ ոչ: Դրա համար օրենքով սահմանված ընթացակարգեր կան»,-եզրափակեց վարչապետը:
Լուիզա ՍՈՒՔԻԱՍՅԱՆ
