Հայաստանի առաջին Հանրապետության կազմավորման եւ Մայիսյան հերոսամարտերի 100-ամյակի առթիվ Հայաստան են ժամանել մի շարք ականավոր քաղաքական գործիչների ժառանգները, այդ թվում՝ Արամ Երկանյանի ծոռնուհին՝ Ալեքսիա Ասատուրյանը: Արամ Երկանյանն ազատագրական շարժման գործիչներից է. 1921 թվականի ապրիլի 17-ին «Նեմեսիս» գործողության շրջանակում նա Բեռլինում Արշավիր Շիրակյանի հետ ոչնչացրել է երիտթուրք գործիչներ Բեհաէդդին Շաքիրին և Ջեմալ Ազմիին: Նրա ժառանգներն այժմ բնակվում են Արգենտինայի մայրաքաղաքում եւ տոնական միջոցառումներին մասնակցելու համար Երեւան են ժամանել: Ալեքսիա Ասատուրյանը լրագրողներին պատմեց, որ Արամ Երկանյանը ժամանակին Արգենտինայում է ամուսնացել:
«Տատիկս՝ նրա դուստրը, այժմ 86 տարեկան է: Մեր ընտանիքում շատ ենք կարեւորել հայի ինքնության պահպանումը եւ հայերի հետ ենք ամուսնացել»,-ընդգծեց նա: Ապա հավելեց, որ Երկանյանն իր դստերն այդպես էլ չի տեսել, քանի որ մահացել է թոքախտից. «Ժառանգներս, սակայն, լավ գիտենք նրա պատմությունը: Գիտենք, որ նա մեծ մարդ է եղել»: Ալեքսիայի ամուսինը՝ Ալեխանդրո Միքայելյանն էլ նշեց՝ Արգենտինայում ուշադիր հետեւել են հայաստանյան վերջին բազմամարդ ցույցերին եւ աջակցության երթեր կազմակերպել. «Այսօր հպարտ ենք, որ ժողովուրդը ուրախ է: Ուզում ենք, որ նոր Հայաստանում վերջապես ամեն ինչ լավ լինի»:
«Շատ էինք հուզվել: Ցանկանում ենք օր օրի ավելի լավ Հայաստան տեսնել»,-իր հերթին վերհիշեց Ալեքսիա Ասատուրյանը՝ նաեւ տեղեկացնելով, որ մոտ քառասուն արգենտինահայ երիտասարդներ վերադարձել են հայրենիք եւ առայժմ ցանկանում են երեք տարով բնակություն հաստատել՝ աշխատելով կամավորական գործունեություն ծավալող կազմակերպություններում:
Արմեն Սահակյանն էլ Լոնդոնից է եկել՝ հայրենի Ստեփանավան գնալու համար: Նա 1918 թ.-ին Հայաստանի Դեմոկրատական Հանրապետության առաջին խորհրդարանի նախագահ Ավետիք Սահակյանի թոռն է: Լրագրողներին Արմեն Սահակյանը տեղեկացրեց, որ շուտով Լոնդոնում իր անձնական միջոցներով տեղադրվելու է Ավետիք Սահակյանի հուշարձանը: «Այսօր էլ կան անձինք, որոնք ժառանգել են նման գործիչների արժանիքները: Այդպիսի մարդիկ պետք է գիտակցեն, թե ինչ անցյալ ունի Հայաստանը եւ ինչպիսի ապագա պետք է ունենա»,-ասաց Սահակյանը: Նա նաեւ դրական գնահատեց «Իմ քայլը» ժողովրդական շարժմանը. «Այն ցույց տվեց, որ քաղաքացիները հիշում են իրենց պատմությունը»:
Միքայել Վերմիշյանն էլ 1918թ. առաջին վարչապետ Հովհաննես Քաջազնունու կոալիցիոն կառավարության ՀԺԿ-ական երկրորդ նախարար Գևորգ բեկ Մելիք-Ղարագյոզյանի եւ Պարենային ապահովության նախարար Քրիստափոր Վերմիշյանի ժառանգն է: Ասում է՝ այսօր իր պապերի պես գործիչներ չկան, ժամանակները եւ չափանիշներն են փոխվել: Իր ականավոր պապի մասին նա մի դրվագ վերհիշեց. «1918թ. Մելիք-Ղարագյոզյանը հայկական պատվիրակության կազմում մեկնել էր Գերմանիա, եւ նրան ընդունել էր այդ երկրի արտգործնախարարը: Հայկական պատվիրակությունը հայանպաստ գործեր է կատարել: Պապս հասկացել է, որ Գերմանիան է «շիրա տալիս» թուրքերին՝ հայերի հանդեպ ցեղասպանություն կատարելու գործում: Այդ մասին պապս ուշագրավ գիրք է գրել, որը լույս կտեսնի հունիսին»:
Լուիզա ՍՈՒՔԻԱՍՅԱՆ
