Մայիսի 24-ին դեսպան Հասմիկ Տոլմաջյանը Ֆրանսիայի Ազգային ժողովում հանդիպեց Ֆրանսիա-Հայաստան բարեկամության խմբի անդամների հետ:
Դեսպանն ընդգծեց հայ-ֆրանսիական առանձնաշնորհյալ հարաբերությունների և բարձր մակարդակի քաղաքական երկխոսության ամրապնդման կարևորությունը: Դեսպան Տոլմաջյանը նշեց, որ Հայաստանում մեծապես կարևորում և սպասում են նախագահ Մակրոնի պետական այցին և Երևանում կայանալիք Ֆրանկոֆոնիայի գագաթաժողովին, ինչպես նաև Եվրոպայի և արտաքին գործերի նախարար Լը Դրիանի առաջիկա այցին:
Կարևորվեց Ֆրանսիայի՝ որպես Մինսկի խմբի համանախագահ երկրի դերակատարությունը Արցախի հիմնախնդրի կարգավորման գործում: Հատուկ շեշտվեց հայ-ֆրանսիական տնտեսական հարաբերությունները զարգացնելու անհրաժեշտությունը:
Դեսպանը ներկայացրեց Հայաստանում տեղի ունեցող իրադարձությունները՝ ընդգծելով ճգնաժամի խաղաղ հանգուցալուծումը: Կարևորվեց նաև երկու երկրների հարաբերություններում միջխորհրդարանական համագործակցությունը, ներառյալ՝ խորհրդարանական բարեկամական խմբերի գործունեությունը և փոխադարձ այցերը: Կողմերն անդրադարձան ս.թ. հունիսի երկրորդ կեսին բարեկամության խմբի պատվիրակության այցին Հայաստան:
Դեսպանը բարձր գնահատեց դեսպանության և բարեկամության խմբերի հետ մշտական և արդյունավետ կապն ու համագործակցությունը, ինչպես նաև պատասխանեց խմբի անդամների հարցերին:
ՀՀ ԱԳՆ
