Դատավոր Արշակ Վարդանյանի վարույթում գտնվող «Սասնա ծռերի» գործով այսօրվա նիստը չկայացավ. ոստիկանության ուղեկցող գումարտակն ամբաստանյալներ Արամ Մանուկյանին, Հովհաննես Հարությունյանին, Թաթուլ Թամրազյանին, Արամ Հակոբյանին, Տիգրան Մանուկյանին, Արայիկ Հակոբյանին, Վարդան Գերավետյանին, Մարտիրոս Հակոբյանին, Սերգեյ Կյուրեղյանին, Գևորգ Իրիցյանին, Թորոս Թորոսյանին դատարան չէր բերել:
Դատավորը ներկա պաշտպաններին տեղեկացրեց՝ ոստիկանության ուղարկած գրության համաձայն՝ «վերջին զանգ»-ի առթիվ շատ միջոցառումներ են նախատեսված, ուստի ոստիկանությունը հասարակական կարգ ապահովելու նպատակով մեծաթիվ ոստիկանական ուժերի է ներգրավել:
Գրության մեջ ասվում է. «Կալանավորներին ուղեկցելու էր Երևանի վարչության ուղեկցող գումարտակը, իսկ դատարանի բակում հասարակական կարգն ապահովելու էին ՊՊԾ գնդի եւ այլ ստորաբաժանումները, որոնք, սակայն, ներգրավված են «վերջին զանգի» միջոցառումներում»: Ըստ այդմ, դատավորի որոշմամբ նիստը հետաձգվեց. հաջորդը մեկ շաբաթ անց է:
Լուիզա ՍՈՒՔԻԱՍՅԱՆ
