«Հետեւողական ենք Իսրայելում տեղի ունեցող զարգացումների հարցում, բայց Իսրայելում Հայոց ցեղասպանության ճանաչման հարցը տարբեր տեսանկյուններից է գնահատվում»,-լրագրողների հետ զրույցում այսօր անդրադառնալով այն փաստին, որ օրերս Իսրայելի խորհրդարանը հավանություն է տվել Հայոց ցեղասպանության ճանաչման բանաձևը Քնեսեթի լիագումար նիստի օրակարգ ներառելուն, ասաց ՀՀ նորանշանակ արտգործնախարար Զոհրաբ Մնացականյանը:
Նրա բնորոշմամբ՝ Իսրայելի խորհրդարանում ծավալված նշյալ գործընթացն առաջին հերթին ներդրում է ցեղասպանությունների կանխարգելման գործում. «Դա ազդակ է առհասարակ»: Ինչ վերաբերում է ՀՀ-ԵՄ համապարփակ եւ ընդլայնված գործընկերության համաձայնագրին, նախարարը նշեց. «Արդեն մեծ առաջընթաց ենք գրանցել եւ կարեւոր հանգրվանի հասել: Ներկայիս կարեւորությունը տրվում է փաստաթղթի դրույթների իրականացմանը»:
Զոհրաբ Մնացականյանը հավելեց, որ հունիսի մեկից կանցնեն համաձայնագրի ժամանակավոր կիրառմանը. «Կձգտենք հնարավորինս ստեղծել այդ համաձայնագրի գործնական կիրառման պայմաններ»:
Լուիզա ՍՈՒՔԻԱՍՅԱՆ
