Երեկ հայտնի դարձավ, որ ՀՀ զինված ուժերի գլխավոր շտաբի պետի պաշտոնում նշանակվել է Արտակ Դավթյանը: Այսօր լրագրողները ԱԺ ճեպազրույցի ժամանակ «Ելքի» պատգամավոր Էդմոն Մարուքյանին հարցրեցին, թե ինչպե՞ս է վերաբերում այդ նշանակմանը, հատկապես, որ Արթուր Աղաբեկյանը բավականին կոշտ գնահատական է տվել՝ ասելով, որ ամենաթույլ գեներալը նշանակվեց ամենապատասխանատու պաշտոնին: Մարուքյանը պատասխանեց, որ ԶՈՒ-ում ծառայել է, բայց զինվորական մասնագիտություն չունի, ինչ վերաբերում է Աղաբեկյանի խոսքերին, «Նա կարող էր նորանշանակ ԳՇ պետի մասին եթե մտահոգություններ ուներ, այլ խողովակներով փոխանցել Փաշինյանին, ոչ թե հրապարակային ասեր:
Միշտ մեզ քննադատում են, որ այ դուք այսինչ բանն ասացիք, թշնամիները լսեցին: Իսկ այս դեպքում եթե անգամ մտահոգությունները հիմնված են ինչ-որ փաստերի վրա, դրանք պետք է այլ խողովակներով փոխանցվեն, խոսքը գնում է ԶՈՒ գլխավոր շտաբի պետի մասին, նա կարող էր հանդիպում պահանջել եւ հանդիպել Փաշինյանի հետ, հատուկ գաղտնի նամակով դիմեր Փաշինյանին եւ իր մտահոգությունները փոխանցել: Սխալ է հրապարակային նման կերպով արտահայտվել նորանշանակ գլխավոր շտաբի պետի մասին: Դա նախկինում եղած բարձրաստիճան զինվորականի կարծիք է: Որքանով է այդ կարծիքը հիմնավոր, ես չգիտեմ, գիտեմ, որ Փաշինյանը բազմաթիվ կոնսուլտացիաներ է արել այս նշանակումը կատարելիս, եթե հանգել է այս նշանակմանը, ուրեմն դրա մեջ կա տրամաբանություն, կան հիմքեր ու հիմնավորումներ, թե ինչու հենց գեներալ-մայոր Արտակ Դավթյանը»:
Հռիփսիմե ՋԵԲԵՋՅԱՆ
