«Եթե մարդը գործարար է, դա չի նշանակում, որ գող է ու ավազակ». Արա Բաբլոյան

ՀՀԿ-ի քաղաքական օրակարգում կուսակցության ղեկավար

Սերժ Սարգսյանի հրաժարականի հարց չկա: Այս մասին այսօր «Հայաստան» համահայկական հիմնադրամի հոգաբարձուների խորհրդի նիստում լրագրողներին հայտնեց ՀՀ ԱԺ նախագահ Արա Բաբլոյանը: «Այս պահին մենք չենք քննարկել կուսակցության ղեկավարի փոփոխության հարց»,-հավաստիացրեց Արա Բաբլոյանը:

Լրագրողները հետաքրքրվեցին՝ «խորհրդարանը ցրելու հիմքեր կա՞ն»: Բաբլոյանը պատասխանեց. «Այս պահին որեւէ նման հիմք չկա»:

Իր եւ Նիկոլ Փաշինյանի հետ «սուր» հարաբերությունների մասին հարցին էլ Արա Բաբլոյանը պատասխանեց. «Սուր չեն եղել մեր մարդկային հարաբերությունները: Ինչպես բոլոր քաղաքակիրթ հասարակություններում, մեր մոտ եւս ամեն բան հստակ կանոնակարգված է: Որպես ԱԺ նախագահ՝ հավասար եմ մոտենում բոլոր պատգամավորներին եւ խմբակցություններին: Որպես ՀՀԿ անդամ՝ ունեմ քաղաքական դիրքորոշում, որը համընկնում է կուսակցության դիրքորոշման հետ»:

ԱԱԾ-ի մեկնարկած՝ ապօրինի հարստացածների առնչությամբ գործողությունների ձեռնարկման մասին էլ Արա Բաբլոյանը նշեց՝ ՀՀ-ում մտավախություններ չունեն: «Պետք է հարգենք մարդու իրավունքը եւ այն մարդկանց իրավունքները, որոնք հարկեր են վճարում եւ զարգացնում պետությունը: Եթե մարդիկ գործարար են եւ մեծ կարողությունների տեր, դա չի նշանակում, որ գող են ու ավազակ: Դա նշանակում է, որ ավելի մեծ ավանդ ունեն երկրի զարգացման գործում»,-դառնալով գործարար-ՀՀԿ-ականներին՝ ասաց Արա Բաբլոյանը:

Լուիզա ՍՈՒՔԻԱՍՅԱՆ