Այսօր ԱԺ ճեպազրույցների ժամանակ Aravot.am-ը Էդմոն Մարուքյանին հարցրեց՝ ԱԺ հայտարարությունների ժամին Արմեն Աշոտյանն ասաց, որ Նիկոլ Փաշինյանը եւ իր կառավարության անդամները Սահմանադրության մի շարք դրույթներ են խախտել, նա նաեւ խոսեց քաղաքական հետապնդման մասին, դուք այդտեղ որեւէ խնդիր, որեւէ խախտում Փաշինյանի կամ նրա կառավարության կողմից տեսե՞լ եք, թե՞ ոչ եւ քաղաքական հետապնդումներ կա՞ն, թե՞ ոչ:
Մարուքյանը պատասխանեց, որ երբ ինքը իրավապաշտպան գործունեությամբ էր զբաղված, բազմիցս քննադատվել է իշխանությունների կողմից. «Ես ասում էի՝ մի անհանգստացեք, որ օրը դուք կլինեք ընդդիմություն, որ օրը ձեզ որեւէ իշխանություն կհետապնդի ու որ օրը ձեր իրավունքները կոտնահարվեն, ես առաջինը ձեզ կպաշտպանեմ: Հիմա էլ կրկնում եմ՝ առաջին քաղաքական հետապնդվողին ես կպաշտպանեմ: Ես չեմ տեսնում որեւէ քաղաքական հետապնդվող անձ այս պահին, խոսքը գնում է նոր իշխանությունների կողմից, ոչ թե բանտերում եղած: Աշոտյանի կողմից ներկայացված սահմանադրական այդ նորմերը, որ ներկայացրել է, գիտեք, երբ մենք ընդդիմադիր, թե իրավապաշտպան դաշտում նման խնդիրներ ենք տեսել, մենք օգտվել ենք ՀՀ ներպետական, դատական համակարգից: Որեւէ բան չի խանգարում Աշոտյանին հավաքել բավարար թվով ստորագրություններ ու դիմել Սահմանադրական դատարան: Նրանք ունեն այդ հնարավորությունը, մենք երկար տարիներ չենք ունեցել նման ստորագրությունների քանակ: Աշոտյանը, օրինակ, կարող է վերջին հաշվով դիմել ՄԻՊ-ին, կարող է դիմել Հելսինկյան քաղաքացիական ասամբլեայի Վանաձորի գրասենյակ, անձամբ Արթուր Սաքունցին, կարող է դիմել Ավետիք Իշխանյանին կամ կարող է դիմել «Իրավունքի Եվրոպա» միությանը: Ես ինքս պատրաստ եմ նրան աջակցել: Բնականաբար, քաղաքական հայտարարություններ են արվում ու դա ներկայացնում են որպես քաղաքական հետապնդում կամ կարծիքի ճնշում: Մենք էլ ենք բազմաթիվ հայտարարություններ արել երկրի նախագահը քննադատել է, կամ վարչապետն ասել է այդպես չի, սուտ են ասում, մենք հայտարարել ենք, ասել ենք՝ հետապնդո՞ւմ է, կամ մեր կարծիքը ճնշեցի՞ն: Վիգեն Սարգսյանը հայտարարություն է արել, Նիկոլ Փաշինյանը ի պատասխան ինչ-որ հայտարարություն է արել, դա հետապնդո՞ւմ է: Բաց, թափանցիկ դիալոգ է, խոսում ենք իրար հետ: Ես կարծում եմ, չկա նման բան»:
Մենք ճշտեցինք՝ ԿԳ նախարարի մասո՞վ էլ չկա խնդիր, Աշոտյանն ասում է, որ ուղղորդում է կուսակցությունից դուրս գալ՝ Մարուքյանը պատասխանեց. «Մենք ունենք քաղաքացիներ, որոնք ասում են, որ մեզ բերել են պարտադրաբար տվել են ՀՀԿ-ի վկայական: Հիմա եթե նման իրավիճակ է եղել, նախարարը կարող է ասել, որ ովքեր պարտադրված են ստացել դա, կարող եք հետ հանձնել, այլեւս այդ ժամանակներն անցել են: Մենք չենք պարտադրելու դառնալ մեր կուսակցության անդամ, ով էլ պարտադրել է, ազատ եք, կարող եք հետ հանձնել: Հիմա պարզ է, չէ՞, որ եթե ինչ-որ ուսուցիչ չհանձնի ու շարունակի հետեւել ՀՀԿ-ի գաղափարախոսությանը, ո՞վ կարող է նրան ասի՝ կուսակցությունից դիմում գրի, դուրս արի: Ես բացառում եմ նման բան: Եթե մի նախարար կլինի, որ նման բան անի, ես ինքս կդատապարտեմ: Բազմաթիվ մարդիկ գնացել հանձնել են, թող գտնեն մեկին, որը կասի, որ ինձ ստիպել են ՀՀԿ-ից դուրս գալ: Թող գտնեն մեկին»:
Մենք նաեւ հարցրեցինք՝ ՀՀԿ խմբակցության անդամ Միհրան Պողոսյանը երեկ հայտարարել էր, որ վենդետա է իրականացվում, իր օգնականին ձերբակալել են, սա քաղաքական հետապնդում է, այդ մասո՞վ էլ չեք համաձայնում՝ Մարուքյանը պատասխանեց. «Ես չգիտեմ ինչի հետ է կապված պարոն Պողոսյանի բողոքը, բնականաբար, պարոն Պողոսյանը իրավաբան է, շատ լավ գիտի ՀՀ օրենսդրությունը, եւ եթե նման բան լինի, սահմանված ընթացակարգերով կարող են ընթացք տալ: Ավելին ասեմ՝ այսօրվա գործող գլխավոր դատախազը ՀՀԿ-ի կողմից ներկայացված է, քննչական կոմիտեի ղեկավարը՝ Աղվան Հովսեփյանը երկար տարիներ ՀՀԿ-ի օրոք եղել է գլխավոր դատախազ, հիմա Քննչական կոմիտեի ղեկավար է, ՀՔԾ ղեկավարը՝ նույնը: Հետեւաբար այնպես չի, որ եթե ինչ-որ խնդիր լինի, այս մարմինները չեն գործի եւ իրավական գնահատականներ չեն տա: Չեն կարող ասել՝ դուք եկաք, բոլոր իրավապահ համակարգերի ներկայացուցիչները փոխվեցին, մենք հետապնդվում ենք: Ոստիկանությունից եղել է պահանջ, որ խաղաղ ցուցարարների նկատմամբ եղած բռնությունների դեպքերով ուսումնասիրություն է իրականացվել, տեսանյութերը կան, մեծ մասը դուք եք տեսանկարահանել, ուսումնասիրում են, եթե ինչ-որ մեկին նույնականացնում են, որ մարդ է ծեծել, ավտո է ջարդել, այդ մարդկանց նկատմամբ բնականաբար քրեական հետապնդում է սկսվել: Հետո պարզվում է, որ այդ մարդը չգիտեմ ում ախպերն ա, եսիմ ում օգնականը: Բնականաբար, դա անձնավորված չի: Անկախ նրանից, թե ովքեր ինչի համար են հետապնդվում՝ դրանք կլինեն ապաքաղաքական մարդիկ, գործող, թե նախորդ իշխանությունից, բոլորը օրենքի առաջ հավասար են: Իրավական գնահատական կտրվի, պատասխանը կլինի անխուսափելի»:
Մանրամասները՝ տեսանյութում:
Հռիփսիմե ՋԵԲԵՋՅԱՆ
