«Անձամբ ներդրում չեմ արել հիմնադրամի համար, բայց մեր ընտանիքն ունի բարեգործական ծրագրեր,-«Հայաստան» համահայկական հիմնադրամի հոգաբարձուների խորհրդի այսօրվա նիստի ժամանակ լրագրողների հետ զրույցում ասաց ՀՀ նախագահ Արմեն Սարգսյանը:
Անդրադառնալով հիմնադրամի նիստում հնչած մտահոգությանը, որ սփյուռքը որպես ֆինանսական աղբյուր է դիտարկվում, Արմեն Սարգսյանը նշեց. «Սխալ է կարծել, թե սփյուռքը միայն դրսից գումարներ ուղարկելու համար է: Յուրաքանչյուրն իր ներդրումն ու իրավունքները պետք է ունենա: Գուցե մի օր հասնենք նրան, որ սփյուռքահայերը եւս կարողանան ՀՀ-ում ընտրությունների մասնակցել»:
Թեման շարունակելով՝ Արմեն Սարգսյանը նշեց. «Եթե ընտրական օրենսգրքում փոփոխություններ կատարելու մասին է խոսքը, ապա հարց է առաջանում՝ միայն ՀՀ քաղաքացինե՞րն իրավունք ունեն ընտրություններում առաջադրվելու, թե սփյուռքում ապրողները եւս: Սփյուռքի հետ կապված հսկայական խնդիրներ ունենք: Սփյուռքահայն այսօր չի կարող ԱԺ-ում պաշտոն ունենալ, որովհետեւ ըստ օրենքի՝ պետք է չորս տարի այստեղ ապրած լինի: Մինչդեռ շատ երկրներում նման բան չկա: Իսրայելում, օրինակ, եթե հրեան այդ երկրի անձնագիր է ստանում, հաջորդ օրը կարող է բարձր պաշտոն ստանալ»:
Նախագահը հավելեց. «Տաղանդավոր սփյուռքահայն այսօր չի կարող պատգամավոր ընտրվել՝ վերոնշյալ սահմանափակման պատճառով: Իսկ ես կուզենայի, որ սփյուռքահայերը եւս ներգրավված լինեին մեր երկրի գործընթացներում: Ազգային հերոս Շառլ Ազնավուրը չի կարող դառնալ ՀՀ նախագահ, որովհետեւ 6 տարի պետք է ՀՀ-ում ապրած լինի: Նույնը եւ Քըրք Քըրքորյանը: Ասածս այն է, որ ՀՀ-ի եւ սփյուռքի միջեւ պատնեշներ կան, որոնք չեն վերացվել»:
Լուիզա ՍՈՒՔԻԱՍՅԱՆ
