«Բոլոր նրանք, որ գիտեն իրավունքը եւ կարողանում են պաշտպանել, նրանց առաջին խնդիրը ոչ այնքան յուր իրավունքների պաշտպանությունն է, որքան այլոց իրավունքների պաշտպանությունը»,-այս համոզմանն է Մարդու իրավունքների նախկին պաշտպան Լարիսա Ալավերդյանը, որն այսօր մասնակցում էր «Հոդված 3 իրավունքի փառատոնի» փակման արարողությանը:
Միջոցառումը կազմակերպվել էր «Հոդված 3» ակումբում, որտեղ ներկայացվեցին փառատոնի շրջանակներում անցկացված լուսանկարների, գեղանկարների եւ մարդու իրավունքներին առնչվող ուղերձների մրցույթների արդյունքները, հաղթողներն էլ մրցանակներ ստացան։
Լարիսա Ալավերդյանի խոսքով, փառատոնը զուտ մի կանգառ է, իրականում մեր կյանքն, իրավունքների առումով, ամենօրյա աշխատանք է պահանջում, ինչը կարող է տալ նոր որակ. «Չկա որակ, եթե դու չես աշխատում ամեն օր: Ո՞ր մեկդ է ուզում, որ ձեր արժանապատվությունը ոտնահարվի, որեւէ մեկը չի ուզում»:
Տիկին Ալավերդյանը հղում կատարելով Համընդհանուր հռչակագրի 29-րդ հոդվածին, հիշեցնում է, որ ամեն մարդ պարտականություն ունի հարգելու այն իրավունքները այն համայնքում, որտեղ որ կկայանա ինքը որպես անձ. «Այսինքն՝ մենք կարեւորում ենք այլոց իրավունքը»:
Մրցույթին մասնակցելու համար ստացվել է 48 ուղերձ. հիմնական պահանջները եղել են մարդու իրավունքներին առնչվելը ինքնատիպությունն ու ներառականությունը:
«Պոկիր իրավունքս թղթից ու դարձրու բոլորի գիտակցությունը» ուղերձը մրցույթի արդյունքում հաղթող ճանաչվածն էր, որի հեղինակը Գյումրիից Լիանա Կարապետյան է: Նրա մրցանակը հանձնեց Հայաստանում ԵՄ պատվիրակության ղեկավար Պյոտր Սվիտալսկին:
Մարդու իրավունքների պաշտպան Արման Թաթոյանն առանձնացրել էր՝ «Պաշտպանելով քո իրավունքները պաշտպանում ես իմը» ուղերձը, որի հեղինակ Անահիտ Ազիզյանին Արման Թաթոյանը հանձնեց հատուկ մրցանակ: Պաշտպանի խոսքով. «Մենք պետք է հարգենք այլոց իրավունքները, դա է հասարակության կայացման գրավականը»:
Լուսինե ԲՈՒԴԱՂՅԱՆ
