Հայաստանի Հանրապետության դատավորների ընդհանուր ժողովի կողմից Հայաստանի Հանրապետության ազգային ժողովին՝ որպես Հայաստանի Հանրապետության Սահմանադրական դատարանի դատավորի թեկնածու առաջադրվել է Ելիզավետա Դանիելյանի թեկնածությունը:
Հիշյալ գործընթացը տեղի է ունեցել հանրության համար բացարձակ գաղտնիության և զրոյական թափանցիկության պայմաններում։ Գործընթացի մասին դատական իշխանության պաշտոնական կայքում չկա որևէ տեղեկատվություն, իսկ լրատվամիջոցներով տեղեկատվությունը տարածվել է միայն 22.05.2018թ.:
Որևէ եղանակով չեն հրապարակվել Հայաստանի Հանրապետության Սահմանադրական դատարանի դատավորի թեկնածուների վերաբերյալ առաջարկությունների և թեկնածուների փաստաթղթերի ներկայացման կարգը և ժամկետները, առաջադրման համար ընտրություն իրականացնելու նպատակով հրավիրվող ընդհանուր ժողովի հրավիրման մասին ևս որևէ տեղեկատվություն չի հրապարակվել, ինչը մտահոգիչ է։
Այս կապակցությամբ «Իրավունքի Եվրոպա միավորում» իրավապաշտպան հասարակական կազմակերպությունը դիմել է Հայաստանի Հանրապետության բարձրագույն դատական խորհրդին,
Հայաստանի Հանրապետության դատական դեպարտամենտին՝ առաջադրելով ամենասեղմ ժամկետներում տրամադրել՝
1.այն կարգը, որով իրականացվել է թեկնածությունների առաջադրումն ու ընտրությունը:
2.Ինչ չափանիշներով և սկզբունքներով է իրականացվել թեկնածուների ընտրությունը:
3.Ովքեր են առաջադրել թեկնածությունները:
4.Ինչ փաստաթղթեր են ներկայացրել թեկնածուները:
5.Ինչ եղանակով է հրավիրվել դատավորների ընդհանուր ժողովը և արդյոք այն եղել է արտահերթ:
6.Ինչ եղանակով են ծանուցվել դատավորները նախատեսվող ընդհանուր ժողովի հրավիրման, անհրաժեշտ փաստաթղթերի ներկայացման և ներկայացվելիք փաստաթղթերի մասին:
7.Քանի դատավոր է մասնակցել ընդհանուր ժողովին։
8.Որ դատավորներն են մասնակցել ժողովին (խնդրում ենք նշել անունները)։
9.Ինչպիսին են եղել քվեարկության արդյունքները:
10.Երբ է տեղի ունեցել թեկնածուի առաջադրումն Ազգային ժողովին, (խնդրում ենք տրամադրել Ազգային ժողովին ներկայացված փաստաթղթրը):
«Իրավունքի Եվրոպա միավորում» ԻՀԿ
