ԵԽԽՎ-ում շատ են կարեւորում կոռուպցիայի կանխարգելման հանձնաժողովը, որն առաջիկայում պետք է ստեղծվի ապօրինի հարստացածների եւ երկրից դուրս հանված գումարների խնդիրների հարցով: Այդ մասին, ԵԽԽՎ Հայաստանի հարցով համազեկուցողներն իրենց մտահոգություններն այսօր ներկայացրել են խորհրդարանական խմբակցությունների ներկայացուցիչների հետ հանդիպման ժամանակ:
Հիշեցնենք, Հայաստանում են ԵԽԽՎ Հայաստանի հարցով համազեկուցողներ, Ուկրաինայի խորհրդարանի պատգամավոր Յուլիա Լյովոչկինան եւ իտալացի պատվիրակ Ջուզեպպե Գալատին: Նրանք այսօր հանդիպումներ են ունեցել Հայաստանի խորհրդարանում:
Հանդիպումից հետո, «Ծառուկյան» խմբակցության պատգամավոր Նաիրա Զոհրաբյանն Aravot.am-ի հետ զրույցում ասաց. «Մենք գիտենք, որ կոռուպցիայի հարցով նախկին բոլոր հանձնաժողովները, որոնք վարչապետին կից կառույցներ են եղել, մեռելածին են եղել: Հայաստանի բոլոր վարչապետները եղել են Հայաստանի ամենահարուստ մարդիկ եւ մենք հասկանում ենք, որ չէր կարող գործադիրի ղեկավարն անկախ կառույց ղեկավարել կամ այդ կառույցը չէր կարող լինել անկախ: Մենք հույս ունենք եւ ակնկալում ենք, որ առաջիկայում ստեղծվող մարմինը կլինի անաչառ»: Ի դեպ, «Ելք»-ը, ՀՅԴ-ն եւ «Ծառուկյան» դաշինքը, համախոհության սկզբունքով, այդ կառույցում մեկ թեկնածու կարող են առաջարկել: Առաջիկայում թեկնածուի շուրջ քննարկումները կսկսվեն:
Ըստ Նաիրա Զոհրաբյանի, եվրոպացի պատվիրակներն արձանագրել են, որ այս նոր քաղաքական իրավիճակը Հայաստանի համար փայլուն հնարավորություն է, որը պետք է ճիշտ օգտագործել:
Եվրոպացի պատվիրակների հետ քննարկվել են նաեւ նոր քաղաքական իրավիճակից ելքերը: Մասնավորաբար`ինչպե՞ս պիտի գնալ արտահերթ ընտրությունների, եթե խորհրդարանում փաստացի մեծամասնություն կազմող ընդդիմադիր ՀՀԿ-ն ամեն կերպ խոչընդոտելու է խորհրդարանի լուծարմանը, նաեւ ԸՕ-ի բարեփոխումների աշխատանքներին:
Քննարկումներ են եղել նաեւ «Ընտանեկան բռնության կանխարգելման մասին» աղմկահարույց օրենքի շուրջ:
Այլ մանրամասները`տեսանյութում
Նելլի ԳՐԻԳՈՐՅԱՆ
