«Մե՞նք ենք սաբոտաժ անում. սաբոտաժ են անում նրանք, որոնք ականջիդ սխալ խորհուրդ են տալիս». Արամ Հարությունյանը՝ Նիկոլ Փաշինյանին

«Ուզում եմ դիմել իմ ընկերոջը, քաղաքական համախոհին՝ Նիկոլ Փաշինյանին, որ իմանա՝ այստեղ իր համակիրներն են, այն մարդիկ, որոնք ուզում են՝ այս հեղափոխությունը հաղթանակի»,- ՀՀ վճռաբեկ դատարանի մոտ անցկացվող ի պաշտպանություն քաղբանտարկյալների ցույցի ժամանակ հայտարարեց «Ազգային համաձայնություն» կուսակցության նախագահ Արամ Հարությունյանը:

Հիշեցնենք՝ Սամվել Բաբայանի համախոհներին չբավարարեցին ՀՀ վճռաբեկ դատարանի քրեական պալատի նախագահ Սերժիկ Ավետիսյանի պարզաբանումներն իրենց պահանջների վերաբերյալ, ուստի «Պոլիտէկոնոմիա» հետազոտական ինստիտուտի տնօրեն Անդրանիկ Թևանյանը զգուշացրեց՝ ճնշումն ավելացնելու են:

Արամ Հարությունյանը հավաստիացրեց՝ ինքն ու իր ընտանիքը 30 տարի սպասել են այս օրվան. ինչպես 1988-ին, հիմա էլ ինքը գոչում է՝ ազատություն: Նա նշեց՝ ուզում է, որ Փաշինյանն իմանա՝ այստեղ միայն այն մարդիկ են, որոնք ուզում են՝ այս հեղափոխությունը հասնի վերջնական նպատակի, որ ՀՀ-ում իրոք լինի բազմակարծություն: Այս առիթով հայտարարեց. «Ստացվում է՝ վերացնում ենք շաքարավազի և բանանի մենաշնորհը, բայց պիտի լինի ընդվզման մենաշնորհ, և դա վերևից պիտի ասվի, թե ում հետ կապված, ուստի չեմ կարծում, որ այդ պարագայում բան ենք շահելու»:

Արամ Հարությունյանը հստակեցրեց՝ իրենց պահանջը գործադիրից չէ, այլ դատական իշխանությունից՝ դատավորից, դատախազից, որոնք մնացել են հինը. «Այս հավաքների նպատակն է, որ հեղափոխությունը համերաշխության է, ուրեմն այլակարծություն պիտի լինի: Այնտեղ, որտեղ կա անհատի պաշտամունք, հաստատ կլինի ժողովրդի թշնամի, և ֆեյքերը կհարձակվեն մարդու վրա: Այս իշխանությունների համախոհները ֆեյսբուքում չեն, այլ Սամվել Բաբայանն է, քաղբանտարկյալները, որոնք կռիվը 1988-ից են տվել: Այնպես պիտի կարողանանք անել, որ որևէ մեկը խնդիր չունենա, արյուն չթափվի: Բայց հեղափոխությունը մեկ օրում չի լինում. դանդաղ գործընթաց է: Ուզում եմ՝ Նիկոլ Փաշինյանը հասկանա, որ մենք իր բարեկամներն ենք, այս հեղափոխության մարտիկները: Ես չեմ մտածում, որ Նիկոլ Փաշինյանը գիտեր՝ Վոլոդյա Ավետիսյանը մեկ ամիս ու կես նստած է, բայց 13-ին եկավ, չմոտեցավ, հացադուլի էինք նստել, չմոտեցավ: Այդ ամենը մի կողմ դրեցինք: Բոլորս ասացինք՝ Նիկոլ, այսօր ժողովուրդը սպասում է, որ դու վերցնես այդ ամենն ու տանես առաջ»:

Արամ Հարությունյանը ՀՀ վարչապետին հորդորեց խորհրդակցել հոր հետ. «Եթե ժամանակին խորհրդակցում էիր ընտանիքիդ հետ, հիմա էլ խորհրդակցիր, հայրդ շատ իմաստուն մարդ է. իր հարցազրույցներում այդ ցավը կա, ամենաշատն ինքն է մտահոգված: Այն մարդիկ, որոնք Սերժ Սարգսյանի նկարը հանել, քոնն են կպցրել, կամ ստատուսներ են գրել, դրանք քո բարեկամները չեն, այլ Սամվել Բաբայանը, Ժիրայր Սեֆիլյանն են քո բարեկամները: Սերժ Սարգսյանի հոգին դատավորների, դատախազների մեջ է, այն մարդկանց մեջ, որոնք չարախնդում են: ՀՀԿ-ն, եթե տազ է արել, նրանք չեն քո բարեկամները կամ այն 58 հոգին: Քո բարեկամները բանտում են: Գիտեմ՝ ընտրություններից առաջ 2017-ին հանդիպել ենք Սամվել Բաբայանի հետ: Նա մի բան էր ուզում, որ բոլոր ընդդիմադիրները մի ցուցակով գնան, քանի որ մարդիկ կան, որոնց բոլոր ընտրությունների ժամանակ ցուցակից հանել են, քանի որ իշխանությունը չի ուզել, որ նրանք խորհրդարան մտնեն»:

Արամ Հարությունյանը հայտարարեց՝ այս հեղափոխությունը միայն գործադիրը չի արել, այլ բոլորը ու պիտի վայելեն բոլորը:

Դառնալով իրենց հասցեին հնչող մեղադրանքներին, թե իրենց կատարածը սաբոտաժ է, պարոն Հարությունյանը վրդովվեց. «Ւ՞նչ է նշանակում սաբոտաժ. ի՞նձ եք ասում սաբոտաժ, երբ իմ տղային գործից հանել են, 2006-ից չեմ աշխատում, տները գրավի տակ են: Մե՞նք ենք սաբոտաժ անում: Սաբոտաժ են անում նրանք, որոնք ականջիդ սխալ խորհուրդ են տալիս: Խորհրդակցի հորդ հետ, քաղաքական ուժերի հետ»:

Պարոն Հարությունյանը հայտնեց, թե պաշտոն չի ունեցել, չի էլ ձգտում պաշտոնի ու դիմելով Նիկոլ Փաշինյանին՝ ասաց. «Ուզում եմ՝ խորհրդակցես մարդկանց հետ, որոնք ճանապարհ են անցել: Այս հաղթանակը բոլորինն է, ոչ թե մի քանիսինը և բոլորս պիտի տեր կանգնենք: Քաղբանտարկյալների հարցը շատ կարևոր է. դրանով է որոշվելու՝ մենք իրոք հաղթե՞լ ենք, թե՞ ոչ»:

Ազգային անվտանգության պետական վարչության պետի նախկին տեղակալ Գուրգեն Եղիազարյանը հստակեցրեց՝ առաջնային պահանջն է մեկ ժամ առաջ ազատության մեջ տեսնել Սամվել Բաբայանին: Նա վստահեցրեց, որ միևնույն է, այդ ամենին ականատես են լինելու վաղ թե ուշ. «Մեր հերոսն այժմ գտնվում է վատ վիճակում, եթե այն իշխանությունների ժամանակ ամեն ինչ պարզ էր, հիմա քաղաքական իրողություն է փոխվել: Միայն Սամվել Բաբայանը չէ, այդ անձանց շարքը մեծ է. մարդիկ, որոնք անիմաստ գտնվում են կալանավայրում»:

Գուրգեն Եղիազարյանը կատարվածը բնութագրեց որպես նյարդերի պատերազմ և հույս հայտնեց, որ շատ շուտով Սամվել Բաբայանը կլինի ազատության մեջ: Նա ամփոփեց. «Հերոսը տանը կլինի. նա իրավունք չունի լինել ճաղերի հետևում»:

Տաթև ՀԱՐՈՒԹՅՈՒՆՅԱՆ