Արմեն Մարտիրոսյանը` Փաշինյանի հեքիաթ կարդալու, Գեղամյանին գրող համարելու ու Քոչարյանի գրքամերժության մասին

«Անտարես» հրատարակչության տնօրեն Արմեն Մարտիրոսյանը ՀՀ վարչապետ Նիկոլ Փաշինյանին առաջարկել է որոշակի պարբերականությամբ ուղիղ եթերով հեքիաթ կարդալ։ Վարչապետն էլ համաձայնել է։

Aravot.am-ի հետ զրույցում պարոն Մարտիրոսյանը նշեց. «Նիկոլ Փաշինյանը հեղափոխության առաջնորդ է եւ շատերի կողմից ընկալվում է որպես փրկիչ` 20 տարվա ռեժիմից: Երբ Փաշինյանին ցույց են տալիս, մարդիկ ուզում են նմանվել իրենց սիրած կերպարին, եւ երբ սիրած կերպարը ընթերցող է, մարդիկ թեքվում են դեպի ընթերցանություն:

Առհասարակ, ամբողջ աշխարհում ընդունված կանոն կա. եթե hասարակության 10%-ին ասեն, որ կարդալու համար բանտ կնստեցնեն, նրանք կգնան բանտ, բայց կկարդան, եթե մյուս 10%-ին ասեն` չկարդաք, բանտ կնստեք, կգնան բանտ ու չեն կարդա: Իսկ 80%-ը կանի այն, ինչ իշխանությունն է անում: Եթե իշխանությունն ընթերցող է, 80%-ը կգնա դեպի ընթերցանություն, եթե ընթերցող չէ, 80%-ը կգնա դեպի չընթերցանություն»:

Արմեն Մարտիրոսյանը հայտարարում է, որ շուրջ 20 տարի չընթերցող, գիրքը չսիրող, չհարգող իշխանություններ ենք ունեցել. «Ժամանակին Ռոբերտ Քոչարյանը հեռուստատեսությամբ ասաց, որ ինքը գիրք կարդալ չի սիրում: Դրա պատճառով ես որպես հրատարակիչ շատ ջանքեր եւ գումար եմ դրել, որ փորձեմ հասարակությանը հանել այդ փոսից: Այդ ժամանակ 6 տարեկան դուստրս մոտեցավ ինձ ու ասաց` հայրիկ, ես այլեւս գիրք չեմ կարդա, որովհետեւ լսել է Ռոբերտ Քոչարյանի ասածը: Իսկ Սերժ Սարգսյանի համար ամենամեծ գրողը այդպես էլ մնաց Արտաշես Գեղամյանը: Ինչքան հիշում եմ, նրա գրքի համար երեք անգամ շնորհանդես արեցին»:

Նա անդրադարձավ նաեւ իր խոսքերով՝ 90-ականների գրագետ, գրող, ընթերցող իշխանություններին` Լեւոն Տեր-Պետրոսյանին, Վանո Սիրադեղյանին, Բաբկեն Արարքցյանին եւ մյուսներին:

Ինչ վերաբերում է այսօրվա իշխանություններին, Արմեն Մարտիրոսյանի համոզմամբ, այն նույնպես ընթերցող է, նաեւ մի քիչ գրող. «Նիկոլ Փաշինյանը որպես լրագրող պրոֆեսիոնալ է, որպես գեղարվեստական ստեղծագործության ժանրի մարդ, իր առաջին քայլն է եղել վեպի ժանրում: Ես չգիտեմ` մյուսները գրո՞ւմ են իրենց համար, կամ հրապարակվել են, բայց որ ակտիվ ընթերցող են, մի վայրկյան չեմ կասկածում: Որ Նիկոլը մեծ ընթերցող է, դա էլ չեմ կասկածում:

Ու երբ հասարակությունը տեսնի, որ ընթերցանությունը կարեւոր է եւ այն պետք է զարգացնել փոքր հասակից` մոր կաթի հետ, դա շատ կարեւոր դեր կունենա հասարակության փոփոխության համար: Թե չէ, երբ ծնողը երեխային ասում է` մի ծխիր, բայց ինքը ծխում է, երեխաների մեծ մասը ծխելու փորձեր է անում, պետք է քո օրինակով դաստիարակես, ոչ թե դատարկ խոսելով:

Այս նկատառումներից լինելով եմ դիմել պարոն Փաշինյանին, որ ընթերցանության կտորը կազմակերպեն: Կառավարության անդամները կկարդան իրենց բալիկների, թոռնիկների համար, իսկ ով բալիկ կամ թոռնիկ չունի, կարող է գրադարանում կարդալ, սիրած դպրոցի առաջին դասարանցիների համար կարդալ, այսինքն՝ բարձրաձայն ընթերցելու մշակույթի ներմուծման խնդիր կա»:

Մեր զրույցի ընթացքում հրատարակիչն անդրադարձավ նաեւ գրքի վրա դրված ավելացված արժեքի հարկին. «Թե Սերժ Սարգսյանի, թե Ռոբերտ Քոչարյանի նախարարները հղում էին անում Ադրբեջանի ավելացված արժեքի հարկի վրա, ասում էին` այնտեղ 20% է, մենք էլ պետք է 20% անենք: Սա էր նախորդ իշխանությունը: Այժմ վերջապես իշխանության են եկել կարդացող ու գրող մարդիկ, որոնք հասարակությանը կտանեն իրենց հետ դեպի կարդալը եւ գրելը»:

Պարոն Մարտիրոսյանն ասաց, որ գիրք կարդալու որեւէ ցանկ չի առաջարկել վարչապետին, որպեսզի տպավորություն չստեղծվի, թե կոնկրետ իր հրատարակչության առաջխաղացմամբ է մտահոգված:

Արմեն Մարտիրոսյանին հիշեցրինք, որ նախկին իշխանության ներկայացուցիչները, մասնավորապես ԿԳ նախկին նախարար Արմեն Աշոտյանն էլ էր ներգրավված իր նախաձեռնությամբ իրականացվող «Խորհուրդ են տալիս հայտնիները» նախագծին: «Այո, Արմեն Աշոտյանը արել է, նա Խնկո-Ապոր գրադարանում էլ է ընթերցել բալիկների համար, այն ժամանակ էլ եմ ասել, հիմա էլ եմ ասում` այո, արել է, ապրի ինքը»: Նաեւ հավելեց, որ Նիկոլ Փաշինյանը նույնպես մինչեւ վարչապետ դառնալը Խնկո-Ապոր գրադարանում կարդացել է իր գրած հեքիաթը:

Գոհար ՀԱԿՈԲՅԱՆ

Լուսանկարը՝ Արմեն Մարտիրոսյանի ֆեյսբուքյան էջից