«Արագաչափերը միշտ գործել են եւ գործելու են: Թյուրըմբռնումներից խուսափելու համար տեղեկացնեմ, որ տեսահսկող համակարգերը գործում են»,-Ոստիկանությունում լրագրողների հետ հանդիպմանն այսօր հայտարարեց ՃՈ պետի տեղակալ Արմեն Խաչատրյանը: Հիշեցնենք՝ կառավարության նիստում օրերս վարչապետ Նիկոլ Փաշինյանը կարծիք էր հայտնել, որ նպատակահարմար է համարում ժամանակավորապես դադարեցնել արագաչափերի գործունեությունը: Արմեն Խաչատրյանը դիմեց վարորդներին՝ ասելով. «Պետք չէ իրավախախտումներ թույլ տալ»:
Ապա նա լրագրողներին հայտնեց, որ վերջին օրերին վարորդների իրավախախտումների աճ է գրանցվել. «Քաղաքացիներից զանգեր ենք ստանում եւ պարզ է դառնում, որ որոշ վարորդներ ճիշտ չեն ընկալել այս ամենը եւ խախտումներ են անում անգամ այն վայրերում, որտեղ տեսահսկող սարքեր կան»: Խաչատրյանն անդրադարձավ Ոստիկանության այսօրվա որոշմանը, համաձայն որի՝ 60կմ/ժ-ից ցածր արագությամբ ռեժիմի վայրերում լուսանկարահանող-արագաչափ սարքերի գործադրումը դադարեցվելու է: Նա շեշտեց՝ դա չի ենթադրում, որ վարորդները կարող են կարգազանցություն թույլ տալ:
«Վերջին օրերին մի շարք արագաչափերի վնաս է հասցվել կրակելու եւ այլ միջոցներով: 3 արագաչափի գողության փաստ ունենք այս պահին: Հայտարարում ենք, որ արագաչափերը պետական սեփականություն են եւ պատկանում են ոստիկանությանը, եւ նման գործողություններով քաղաքացիները վնաս են հասցնում ՀՀ շահերին»,-եզրափակեց Արմեն Խաչատրյանը:
Լուիզա ՍՈՒՔԻԱՍՅԱՆ
