Վարչական վարույթ իրականացնելու համար հիմք է հանդիսացել lragir.am-ում մայիսի 21-ին հրապարակված բաց նամակը՝ ուղղված Տարածքային կառավարման և զարգացման նախարար Սուրեն Պապիկյանին:
Նամակում գիտական ոլորտի մի խումբ ներկայացուցիչներ իրենց դժգոհություններն են արտահայտում Արխիվի տնօրենի նկատմամբ, մասնավորապես նշելով, որ վերջինիս և Արխիվի որոշ աշխատակիցների կողմից խախտվում են ՀՀ արխիվային օրենսդրության մի շարք նորմեր, փակ են պահվում որոշ ֆոնդեր և գործեր, արհեստական խոչընդոտներ են ստեղծվում Արխիվում հետազոտություններ իրականացնող քաղաքացիների նկատմամբ, սահմանված են Արխիվում տրամադրվող ծառայությունների գնագոյացման անհասկանալի սկզբունքներ և մեխանիզմներ:
Նախարար Սուրեն Պապիկյանի հրամանով ՏԿԶՆ աշխատակազմի իրավաբանական և ներքին աուդիտի բաժնի փորձագետները ստացված փաստերի բացահայտման նպատակով վարչական վարույթի շրջանակներում իրականացնում են ուսումնասիրություններ:
ՀՀ տարածքային կառավարման և զարգացման
նախարարություն
Հ. Գ. Ամատունի Վիրաբյանը լրագրողներին այս նամակի մասին ասել է. «Այս տարիների ընթացքում միայն մեկ մարդու՝ Մայքլ Բաբայանի առջեւ է արգելք դրվել, որը փորձել է արխիվը դարձնել իր համար բիզնեսի աղբյուր՝ կայք ստեղծելով եւ գումարի դիմաց փաստաթղթերը վաճառելով։ Հենց նա էլ գրել է բաց նամակը, որը ստորագրած երեսուն հոգուց ընդամենը երեքն են դիմել արխիվ՝ Մ․ Բաբայանը, Վոլոդյա Հարությունյանը եւ Անուշ Ամսեյանը: Մյուսները երբեւէ չեն դիմել արխիվից օգտվելու համար»: Նա նաեւ նշել է, թե այդ նամակի մեջ միակ ճիշտն այն է, որ «350 աշխատակցի մեջ 3 ազգակցական ունեմ»:
