ԿԳ նախարար Արայիկ Հարությունյանը մայիսի 22-ին Խ. Աբովյանի անվան պետական մանկավարժական համալսարանում հանդիպեց ԿԳՆ ենթակայության և ոչ պետական հանրակրթական ուսումնական հաստատությունների տնօրենների հետ:
ԿԳ փոխնախարար Մանուկ Մկրտչյանն ասաց, որ հանդիպման նախաձեռնությունը նախարարինն է եղել: Նա հավելեց, որ դահլիճում հավաքված են կրթության ոլորտի ներկայացուցիչներ, որոնք անկախ կուսակցական պատկանելությունից հաղթահարել են դժվարություններ ու կրթության ոլորտը զերծ են պահել տարբեր տեսակի անախորժություններից եւ անհաջողություններից:
Արայիկ Հարությունյանը նշեց, որ երկրում իրավիճակ է փոխվել, եւ ուսուցիչներն ու տնօրենները այլեւս այլ պայմաններում են աշխատելու: Նա նաեւ չհամաձայնեց Մանուկ Մկրտչյանի ասածին. «Համաձայն չեմ, որ մեծամասնությունը տարբեր քաղաքական ազդեցություններից զերծ է պահել դպրոցը»:
Մանրամասները` տեսանյութում:
Նախարարը կրկին անդրադարձավ դրամահավաքներին, կոչ արեց ուշադրություն դարձնել նման երեւույթներին: Հավելեց, որ Վերջին զանգի միջոցառումները, Այբբենարանի հանդեսները չեն արգելվում, սակայն նման միջոցառումները պետք է ավելի զուսպ ծախսերով իրականացվեն:
Նա ասաց, որ այլեւս որեւէ մանկավարժ քաղաքական հայացքների համար չի ճնշվելու, իսկ դպրոցից դուրս յուրաքանչյուրը կարող է զբաղվել քաղաքականությամբ:
Մանրամասները` տեսանյութում:
Ինչ վերաբերում է առաջիկա քննություններին, Արայիկ Հարությունյանը վստահեցրեց, որ լավագույնները կստանան իրենց արժանի գնահատականը, իսկ ովքեր չեն հաղթահարի նվազագույնի շեմը, ուժերը կփորձեն հաջորդ տարի: «Չեմ բացառում, թե կոնկրետ այս քննությունների այդ սկզբունքը կաշխատի, բայց բոլորը պետք է գիտակցեն, որ խնամի-ծանոթ-բարեկամի միջնորդությունները ամենադատապարտելին են»,-շեշտեց նա:
Արայիկ Հարությունյանը խոսելով ավագ դպրոցի վերաբերյալ փոփոխությունների մասին՝ ասաց, որ լուծումներ պետք է գտնվեն. «Իմ կարծիքն այն է, որ 12-ամյա կրթությունը լավ համակարգ է, պարզապես պետք է դրա տակ լուրջ բովանդակություն դնենք»: Նախարարը նշեց, որ բուհերում դասավանդվող հիմնական առարկաներից որոշները կարող են դասավանդվել ավագ դպրոցներում:
Մանրամասները` տեսանյութում:
Գոհար ՀԱԿՈԲՅԱՆ
