2018 թվականի ապրիլի 21-ին Համահայկական մեծ ընդվզում անցկացնելու նպատակով «Երկիր Ծիրանի» կուսակցությունը նախագահ Զարուհի Փոստանջյանի գլխավորությամբ Սյունիքի մարզի Կապան քաղաքում իրականացնում էր ՀՀ Սահմանադրությամբ ամրագրված խաղաղ և օրինական հավաք ու երթ:
Հավաքի ավարտական փուլում՝ Կապանի քաղաքապետարանի առջև կուսակցության նախագահ Զարուհի Փոստանջյանի ելույթի ժամանակ շուրջ 100 հոգի, մասնավորապես՝ Զանգեզուրի պղնձամոլիբդենային կոմբինատի աշխատակիցները և ՀՀԿ-ի կողմից հատուկ բերված բազմաթիվ այլ մարդիկ՝ ալկոհոլի, և չենք բացառում՝ նաև թմրամիջոցների ազդեցության տակ, դիտավորյալ սադրելու նպատակով միջամտել էին խաղաղ հավաքին՝ իրականացնելով ՀՀ քրեական օրենսգրքով նախատեսված մի շարք հոդվածների խախտումներ:
Նույն օրը «Երկիր Ծիրանի» կուսակցության նախագահ Զարուհի Փոստանջյանը հանցագործության մասին հաղորդում էր ներկայացրել ՀՀ գլխավոր դատախազին, Ոստիկանության պետին և Մարդու իրավունքների պաշտպանին:
ՀՀ ոստիկանության Սյունիքի մարզային վարչության Կապանի բաժնում հետաքննություն իրականացնող մարմինը 05.05.2018թ. կայացրել էր բացահայտ անօրինական որոշում՝ չկատարելով բազմակողմանի, լրիվ և օբյեկտիվ հետաքննություն և մերժելով հարուցել քրեական գործ:
Վերոնշյալ որոշումն այսօր՝ 2018 թվականի մայիսի 22-ին, «Երկիր Ծիրանի» կուսակցության նախագահ Զարուհի Փոստանջյանը բողոքարկել է ՀՀ գլխավոր դատախազին և Մարդու իրավունքների պաշտպանին:
«Երկիր Ծիրանի» կուսակցության լրատվական ծառայություն
22 մայիսի 2018
Երևան
