Այսօր Գյումրու կենտրոնական հատվածները սպասարկող 20 համարի միկրոավտոբուսի վարորդներից ոմանք գործադուլ էին հայտարարել՝ կանգնելով Անի թաղամասի Հակոբ Մծբնեցի եկեղեցու մոտ: Գիծը սպասարկող 1-2 միկրոավտոբուսներ են աշխատել, որը և որոշակի անհարմարություններ է ստեղծել ուղևորների համար:
Մենք մոտեցանք գործադուլ հայտարարած վարորդներին՝ փորձելով հասկանալ պատճառը.նրանց մեծ մասը չցանկացավ ասել իրական պատճառը, միայն մեկը դժգոհեց, թե չեն կարող սահմանված գումարը մուծել, կցանկանային, որ այն իջեցվեր:
Թե ինչքան է գումարը, ում են մուծում, մեր զրուցակիցն այլ մանրամասներ չասաց, կողքի վարորդներն անմիջապես սաստեցին, որ չխոսի:
Գյումրու քաղաքապետարանի տրանսպորտի բաժնի պետ Արտյոմ Սարգսյանը պարզաբանեց, որ վարորդների խնդիրը գիծը շահած ընկերության հետ է: Քանի որ ամռան ամիսներին դպրոցների, բուհերի արձակուրդ գնալու հետ կապված ուղևորահոսքը կտրուկ նվազում է, վարորդները գիծը շահած ընկերության ղեկավարությանը խնդրում են աշխատանքային նոր գրաֆիկ մշակել. երթուղի դուրս եկող միկրոավտոբուսների թիվը նվազեցնել գոնե 2-3-ով, որպեսզի կարողանան ՍՊԸ-ի սահմանած գումարը մուծել: Քաղաքապետարանի տրանսպորտի բաժնի պետն ասաց, որ հարցը կկարգավորեն այնպես, որ ուղևորների համար ոչ մի անհարմարություն չստեղծվի:
Նունե ԱՐԵՎՇԱՏՅԱՆ
