«Նախիջեւանի հատվածում Ադրբեջանի կողմից կատարվում են որոշակի աշխատանքներ, որոնք անմիջական վտանգ են ստեղծում մեր դիրքերի համար»,-ԱԳՆ-ում այսօր լրագրողների հետ հանդիպմանն անդրադառնալով հակառակորդի կողմից Նախիջեւանի հատվածում իրենց իսկ դիրքերի բարելավմանն ուղղված ինժեներական գործողություններին, ասաց ԱԳՆ մամուլի խոսնակ Տիգրան Բալայանը: Նա մեկնաբանեց Ադրբեջանի ԱԳՆ-ի հայտարարությունը, որում իրենց կողմից մարտական կորստի հանգամանքը բարդվում է հայկական կողմի վրա:
Տիգրան Բալայանը նկատեց՝ ողջամիտ չեն Ադրբեջանի ԱԳՆ-ի որակումները, թե հայկական կողմի ռազմական հրամանատարությունն է հրաձգության ցուցում տվել. «Չեմ բացառում, որ զոհի փաստը եղել է իրենց իսկ ներանձնային հարաբերությունների պատճառ: Ամեն դեպքում, մենք դիրքային փոփոխություն որեւէ հատվածում թույլ չենք տալու»:
Լրագրողներից մեկը Տիգրան Բալայանից հետաքրքրվեց՝ «տարիներ շարունակ որոշակի խոսակցություններ են եղել Արցախի դիմաց Մեղրին հակառակորդին հանձնելու մասին, նման օրակարգ կա՞»: Տիգրան Բալայանը պատասխանեց. «Նման հարց օրակարգում ոչ եղել է, ոչ էլ կա»:
Լուիզա ՍՈՒՔԻԱՍՅԱՆ
