Այսօր ՀՀ նախագահի նստավայրում տեղի է ունենալու նախարարների երդման արարողությունը: Մինչ այդ, նախագահի նստավայրի մուտքի լրագրողների հետ զրույցում տնտեսական զարգացման եւ ներդրումների նախարար Արծվիկ Մինասյանն անդրադառնալով ոլորտին, ասաց. «Ակնհայտ է, որ կարիք ունենք թե՛ վարչարարությունը բարելավելու, հնարավոր հովանավորչական դեպքերը բացառելու, հակամենաշնորհային առավել ակտիվ քաղաքականություն իրականացնելու ուղղությամբ»:
Պարոն Մինասյանն ասաց, որ այդ ամենին հասնելու համար հարկավոր է օրենսդրական փոփոխություն կատարել, որպեսզի համակարգը հասցնեն ինստիտուցիոնալ մակարդակի, ոչ թե թողնեն անձերի մակարդակի վրա:
Հարցին՝ ԱԱԾ պետի՝ «սպասել կոռուպցիոն լուրջ բացահայտումների» հայտարարությունից հետո կարելի՞ է սպասել աղմկահարույց բացահայտումների, այս հարցին ի պատասխան նախարարն ասաց.
«Ես կարծում եմ պետք է սպասել հրապարակումների, հետո նոր հարցեր ձեւակերպել, այն էլ՝ մեղադրական տոնով: Եթե կան ապօրինի հարստացման դեպքեր՝ բյուջեի վնասը կվերականգնվի»:
Նելլի ԲԱԲԱՅԱՆ
