«Ազատություն» ռ/կ-ի Ֆեյսբուքյան ասուլիսի ժամանակ պատասխանելով մեր այն հարցին` արդյոք բոլոր ռեկտորներին աշխատանքից ազատելով կարող է կրթության մատչելիության եւ որակի հարց լուծել, ԿԳ նախարար Արայիկ Հարությունյանն ասաց. «Կարծում եմ` մեկը մյուսի հետ անուղղակիորեն կապ ունի, դա համալիր խնդիր է: Այդ խնդիրներին բախվել ենք տարիներ շարունակ, որովհետեւ ռեկտորներին ովքե՞ր էին նշանակում, այն խորհուրդները, որոնք իշխանությունն էր ձեւավորում: Այդ ռեկտորները ստիպված էին որոշակի պարտավորություններ ունենալ` իշխանությունների հանդեպ: Կառավարման արդյունավետության խնդիր կա, քանի որ որոշ միջոցներ գնում էին իշխանամերձ հիմնադրամներին, օրինակ «Երիտասարդական հիմնադրամին», եւ սա, այո, արվում էր այդ հարցի վրա»:
ԿԳ նախարարը անդրադառնալով կրթության մատչելիությանը նաեւ հայտարարեց, որ անվճար կրթությունը ընդհանուր կրթական քաղաքականության խնդիր է, որը պետք է դեռ քննարկվի:
«Շատ հուսով եմ, որ առաջիկա տարիներին տնտեսական բավարար աճ ապահովելով` մենք կանդրադառնանք, կքննարկենք բարձրագույն կրթությունը անվճար դարձնելու հարցը: Հիմա չեմ ուզում ասել, որ սա օրակարգային հարց է` հաշվի առնելով առկա տնտեսական իրավիճակը: Երբ կլինի ցանկալի իրավիճակ, Հայաստանում բարձրագույն կրթությունն էլ անվճար կլինի»:
Գոհար ՀԱԿՈԲՅԱՆ
