Գլխավոր դատախազության շենքը վաղ առավոտից, ինչպես հայտնել ենք, շրջափակել են «Սասնա ծռերի» եւ Սամվել Բաբայանի կողմնակիցները:
Անդրանիկ Թեւանյանն ասաց, որ Վճռաբեկ դատարանի նախագահ Արման Մկրտումյանն այն եզակի անձանցից մեկն է, ում հետ կապված Եվրոդատարանն անվանական որոշում է կայացրել, որ նա իրավունք չունի զբաղվել դատական գործունեությամբ. «Այդ մարդը հիմա պետք է որոշում կայացնի, թե արդյոք ընդունի՞ Սամվել Բաբայանի գործը վարույթ, թե՞ չընդունի»:
Ըստ Թեւանյանի, բացի գլխավոր դատախազ Արթուր Դավթյանից, Վճռաբեկ դատարանի նախագահը պետք է նույնպես հրաժարական տա:
Նա ասաց, որ արդեն մեկ ամիս է, որ հայց է ներկայացվել Վճռաբեկ դատարան, բայց արձագանք չկա, թե ինչ որոշում կայացնեն. «Մենք միջանկյալ քայլ ենք կատարել, նախքան վարույթ ընդունումը Վճռաբեկ դատարանը հնարավորություն ունի փոխել Սամվել Բաբայանի խափանման միջոցը կալանքից ազատություն: Մեր երկու պատգամավորները՝ «Ելք» դաշինքից Սասուն Միքայելյանն ու Հովիկ Աղազարյանը տվել են իրենց ստորագրությունները՝ որպես երաշխավորագիր, որպեսզի մենք ներկայացնենք միջնորդություն՝ Սամվել Բաբայանի կալանքը փոխելու վերաբերյալ»:
Միջնորդությունը հանձնվեց դատախազությանը:
Հռիփսիմե ՋԵԲԵՋՅԱՆ
