Aravot.am-ը Պաշտպանության նախարարության մամուլի խոսնակ Արծրուն Հովհաննիսյանից հետաքրքրվեց` արդյոք Պաշտպանության նախարարության հետ համաձայնեցված է եղել ԿԳ նորանշանակ նախարար Արայիկ Հարությունյանի` ավարտական քննությունները մեկ շաբաթով հետաձգելու որոշումը, ինչը վերջին օրերին բուռն քննարկումների տեղիք է տվել:
«Չգիտեմ ինչ է եղել համաձայնեցված, որովհետեւ նախարարների խոսակցություն կարող է եղած լինի, որից ես տեղյակ չլինեմ, բայց մի բան կարող եմ ասել, որ անհեթեթություն է այն խոսակցությունը, որ իբր պաշտպանության նախարարն ասել է` բա ով է դիրքերում կանգնելու»,-ասաց Արծրուն Հովհաննիսյանը:
Հարցրինք` զորակոչի մեկնարկին համաձայնեցվելու հետ կապված խնդիրներ չի՞ առաջացնի այդ որոշումը: «Ես կարող եմ իմ դիրքորոշումն ասել, բայց չգիտեմ այս պահին գլխավոր շտաբն արդյոք կիսո՞ւմ է իմ դիրքորոշումը հակասության վերաբերյալ: Մեզ մոտ շատ է եղել, որ զորակոչերը շաբաթով էլ, տասը օրով էլ տեղափոխվել են, դրանում ոչ մի ողբերգական բան չեմ տեսնում»,- պատասխանեց Պաշտպանության նախարարության մամուլի խոսնակը:
Հավելենք, որ սոցցանցը որպես աշխատանքային գործիք կիրառող ԿԳ նախարարը, դեռ չի պատասխանել ֆեյսբուքով իրեն ուղղված մեր նույն հարցմանը:
Գոհար ՀԱԿՈԲՅԱՆ
