Դատավոր Ռոբերտ Պապոյանի նախագահությամբ այսօր «Մանախ» անունով հայտնի Արթուր Այվազյանի գործով հերթական դատական նիստն էր: Հիշեցնենք՝ նա մեղադրվում է 2017թ. «Ելք» դաշինքի համակիր Հ. Սարգսյանի հանդեպ Անդրանիկի անվան փողոցի շենքերից մեկի բակում բռնություն գործադրելու համար: Ըստ մեղադրանքի՝ նրա մոտ ատրճանակ է եղել:
Այսօրվա նիստին վկաները չէին ներկայացել, թեեւ դատավորը կողմերին տեղեկացրեց, որ նրանք պատշաճ ծանուցվել են: Դատարանը որոշեց նրանց կրկին ծանուցել:
«Ելք» դաշինքի ներկայացուցչի շահերի պաշտպան Նիկոլայ Բաղդասարյանը եւս նիստին չէր ներկայացել: Հաջորդ նիստը կկայանա արդեն հունիսին:
Aravot.am-ի հետ զրույցում ամբաստանյալ Արթուր Այվազյանն ասաց, որ չի ցանկանում միջադեպի առնչությամբ մեկնաբանություններ տալ. «Դեռ վկաներ պետք է հարցաքննվեն, այս փուլում նպատակահարմար չեմ գտնում»:
Նույն պատճառաբանությունը ներկայացրեց նաեւ նրա շահերի պաշտպան, փաստաբան Հայկ Ալումյանը:
Հավելենք, որ այս գործով մոտ 15 վկա կա:
Լուիզա ՍՈՒՔԻԱՍՅԱՆ
