Քիչ առաջ ՀՀ ԱԱԾ տնօրեն Արթուր Վանեցյանը լրագրողների հետ հանդիպման ժամանակ խոստացավ՝ մոտ օրերս կլինեն լուրջ կոռուպցիոն սխեմաների բացահայտումներ. «Կարճ ժամանակում ականատես կլինեք խոշոր կոռուպցիոն սխեմաներով հարստացած մարդկանց հայտնաբերման և օրենքի ուժով պատասխանատվության ենթարկման: Դա չի նշանակում, որ գնալու ենք ռեպրեսիաների և վրեժխնդրության: Ցանկացած գործ ցանկացած անձի վերաբերյալ լինելու է հրապարակային, որպեսզի որևէ մեկի մոտ կասկած չհարուցի, որ տվյալ անձը պետությունից գումար է գողացել և հաստացել է: Իմ մոտեցումն է, որ ապօրինի հարստացած մարդիկ վերադարձնեն գումարները պետական բյուջե, այլ ոչ թե գնան, նստեն բանտերում»:
Նրա խոսքով՝ Հայաստանում մոտ 350 մարդ կա, որոնք տեղյակ չեն, որ իրենց անունով գրանցված է կազմակերպություն. «Նրանք տեղյակ չեն, ծանր սոցիալական վիճակում գտնվող մարդիկ են, որոնցից անձնագրերը վերցրել են 5, 10, 20 հազար դրամով և նրանց անունով գրանցել են անհատ ձեռնարկություններ, ԱՊԸ-ներ և այլն»:
Պարոն Վանեցյանը նաև հերքեց այն լուրերը, թե Հայաստանում գտնվում են ԱՄՆ-ից ժամանած FBI (ԱՄՆ Հետաքննությունների դաշնային բյուրո) քննիչներ:
«Չեմ պատրաստվում կադրային փոփոխություններ իրականացնել, առաջարկել եմ իմ տեղակալներին շարունակել աշխատանքը: Իհարկե կլինեն որոշակի կադրային փոփոխություններ, որոնք կլինեն ընթացիկ: ԱԱԾ տնօրենի գործող տեղակալները կշարունակեն աշխատանքը, որևէ խնդիր չի լինի»,- ասաց Արթուր Վանեցյանը:
Մանրամասն՝ տեսանյութում
Տաթև ՀԱՐՈՒԹՅՈՒՆՅԱՆ
