Ազատ ոճի ըմբշամարտի Հայաստանի պատանեկան հավաքականն այսօր վաղ առավոտյան Սկոպյեից վերադարձավ Հայաստան: Մեր պատանի ըմբիշները Եվրոպայի այս տարիքային խմբի առաջնությունում նվաճել են մեկական ոսկե, արծաթե եւ բրոնզե մեդալ:
«Փարավոն» ժամանցի եւ հանգստի համալիրում նրանց դիմավորեց ՀՀ սպորտի եւ երիտասարդության հարցերի նորանշանակ նախարար Լեւոն Վահրադյանը:
«Շնորհավորում եմ բոլորիս այս մեդալների համար: Հետեւել եմ տղաների գոտեմարտերին: Պատանի ըմբիշների այս մեդալները մեծ սպորտի հիմքն են դնում: Հիմա պիտի շարունակենք նրանց համար հաջողությունը զարգացնելու պայմանները բարելավել», – ասաց նախարարը Aravot.am-ին:
Խոսելով ավելի վաղ Եվրոպայի մեծահասակների առաջնությունում ազգային հավաքականի անհաջող մրցելույթների մասին՝ պարոն Վահրադյանն ասաց. «Մեծ սպորտում հաղթանակներն ու պարտությունները քայլում են զուգահեռ: Դա անխուսափելի է: Ավելի լավ արդյունքների էինք սպասում: Առաջին իսկ հարմար առիթի դեպքում ֆեդերացիայի հետ միասին կհանդիպենք մարզիչներին, կլսենք նրանց, կվերլուծենք եւ կանենք հնարավոր այն ամենը, ինչ անհրաժեշտ է կազմակերպական աշխատանքներն ավելի արդյունավետ կազմակերպելու համար»: Լեւոն Վահրադյանն ընդգծեց, որ դա վերաբերում է ընդհանրապես մեծ սպորտին:
Աշոտ ՀԱԿՈԲՅԱՆ
Հ. Գ. Լեւոն Վահրադյանի հետ հարցազրույցը՝ տպագիր «Առավոտի» առաջիկա համարում
