Այսօր ԱԺ Տարածքային կառավարման, գյուղատնտեսության եւ բնապահպանության հարցերի մշտական հանձնաժողովի նիստում բնապահպանության փոխնախարար Խաչիկ Հակոբյանը ներկայացրեց «Հողային օրենսգրքում» փոփոխությունների նախագիծը, որը ՀՀ-ի անապատացման դեմ ռազմավարության համապատասխան է մշակվել: Նախագծով առաջարկվում է ցամաքային տարածքի ծածկույթ սահմանումը տալ օրենսգրքում, այն բխում է ՄԱԿ-ի կայուն զարգացման օրակարգի ապահովման դրույթներից: Հստակեցվում է հողային դասակարգումը եւ հնարավորություն է տալիս հողային ռեսուրսները ճիշտ օգտագործել:
Իրենց պատկանող հողերի ցամաքային ծածկույթի դասակարգման պարտավորությունը համայնքների վրա է:
Բնապահպանության նախկին նախարար, հարակից զեկուցող Արամ Հարությունյանն ասաց. «Խնդիրներ ենք ունենալու ցամաքային տարածքի ծածկույթի դասակարգման կարգը, օգտակար հանածոյի հանույթի նպատակով, տարբեր նշանակության հողերի մեկանգամյա օգտագործման կարգերը մշակելու տեսանկյունից: Անհրաժեշտ է այս կարգերը հնարավորինս արագ մշակել եւ դնել գործողության մեջ»:
Հանձնաժողովը դրական եզրակացություն տվեց նախագծին:
Հռիփսիմե ՋԵԲԵՋՅԱՆ
