«Ներողություն եմ խնդրում Պավլիկ Մանուկյանի ընտանիքից, բայց չեմ հասկանում՝ ինչո՞ւ հիմա նրանց բաց թողնեն». Կ. Խոդիկյան

Դրամատուրգ Կարինե Խոդիկյանն այսօր «Հայելի« մամուլի ակումբում լրագրողների հետ հանդիպմանն անդրադարձավ «Սասնա ծռերի» աջակիցների՝ վերջիններիս ազատ արձակելու պահանջին, որի առնչությամբ այսօր նստացույցեր եւ բողոքի գործողություններ են ընթանում Երեւանի ընդհանուր իրավասության դատարանի Շենգավիթի նստավայրի շենքի եւ դատախազության առաջ:

Կարինե Խոդիկյանը նախ նշեց, որ վաղուց ճանաչում է ամբաստանյալներից Պավել Մանուկյանին եւ նրա ընտանիքին, բայց ճիշտ չէ ակնկալել, թե վարչապետ Նիկոլ Փաշինյանի մեկ զանգով ամբաստանյալներին բաց կթողնեն: «Հասկանում եմ Մանուկյանի ընտանիքի սպասումները, բայց մի՞թե ուզում են  Նիկոլը զանգի ու նրանց բաց թողնեն: Այդպես կստացվի, որ մի զանգով դուրս եկան բանտից: Այդ դեպքում ի՞նչ տարբերություն՝  Փաշինյանի՞ զանգը կլինի, թե՞ Սերժ Սարգսյանի: Ներողություն եմ խնդրում Պավլիկ Մանուկյանի ընտանիքից, բայց չեմ հասկանում՝ ինչո՞ւ հիմա նրանց բաց թողնեն»,-հարցադրում արեց Կարինե Խոդիկյանը:

Նա հավելեց. «Իսկ գուցե մեկ շաբաթ ա՞նց: Ժամանակ տանք նոր վարչապետին: Չի կարելի արդարության ճանապարհը սկսել անարդարությամբ: Եթե Փաշինյանը նման զանգ կատարի, դա արդար չի լինի: Կարծում եմ՝ պետք է սեղմ ժամկետում անկախ իրավաբանների հանձնաժողով ստեղծել եւ սպանությունների փաստը բացահայտել (նկատի ունի՝ ՊՊԾ գնդի գրավման օրը եւ դրան հաջորդող օրերին 3 ոստիկանի զոհվելու հանգամանքը)»:

Կարինե Խոդիկյանը կարծում է, որ «Սասնա ծռերի» աջակիցները պետք է շարունակեն բողոքի գործողությունները, բայց շրջափակեն միայն գլխավոր դատախազության շենքը:

Տիկին Խոդիկյանը նաեւ նշեց՝  հիացած է Շանթ Հարությունյանի կոչով, որն օրերս նա ուղղեց բանտից:

Լուիզա ՍՈՒՔԻԱՍՅԱՆ