«Ժամանակ» թերթն այսօր հաղորդել էր. «Մայիսի 9-ին Եվրահանձնաժողովի արտաքին գործերի գերագույն հանձնակատար Ֆեդերիկա Մոգերինին հեռախոսազրույց էր ունեցել Հայաստանի նորընտիր վարչապետ Նիկոլ Փաշինյանի հետ, նրան շնորհավորել էր ընտրության կապակցությամբ և հրավիրել Բրյուսել՝ մասնակցելու բարձր ներկայացուցչական հանդիպման:
«Ժամանակ»-ի տեղեկություններով՝ Փաշինյանին Եվրոպայում սպասում էին մայիսի 16-ին Եվրոպայի արտաքին հարաբերությունների հանձնաժողովի (AFET) նիստին, սակայն Փաշինյանը Եվրոպա չի մեկնել. «Դժվար է ասել՝ պատճառը գերզբաղվածությո՞ւնն է, թե՞ մայիսի 14-ին Փաշինյան-Պուտին հանդիպման ժամանակ ձեռք բերված պայմանավորվածությունները»:
«Առավոտը» հավելյալ մանրամասներ պարզեց կատարվածի մասին: Հաշվի առնելով, որ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանն այդ օրերին Բրյուսելում էր, նրան ներքին կարգով առաջարկել են ներկայացնել Հայաստանն այդ նիստում: Արմեն Աշոտյանը համաձայնել է՝ պայմանով, թե հաշվի առնելով, որ ինքն այլեւս ընդդիմադիր ուժ է ներկայացնում, իսկ հրավերը վարչապետին է վերաբերում, ոչ թե ներքին կարգով պիտի առաջարկեն, այլ պաշտոնապես։ Սակայն պաշտոնական առաջարկ այդպես էլ չի եղել ոչ ԱԳՆ-ից, ոչ կառավարությունից:
Հիշեցնենք, Եվրոպական խորհրդարանի արտաքին հարաբերությունների հանձնաժողովը այդ օրը քննարկել ու հավանություն է տվել ԵՄ-Հայաստան համապարփակ եւ ընդլայնված գործընկերության համաձայնագրին։
Մարիամ ՂԱԶԱՐՅԱՆ
