Այսօր ԱԺ-ում լրագրողների հետ զրույցում ՀՀԿ խմբակցության պատգամավոր Խոսրով Հարությունյանը հարցին՝ ՀՀԿ-ականներից տեսակետներ են հնչում, որ իրենք դեմ են արտահերթ խորհրդարանական ընտրություններին, դուք այդ հարցը քննարկե՞լ եք՝ պատասխանեց. «Նախ, ես կարծում եմ, որ նման քննարկումներ խմբակցությունում չեն եղել: Այս պահի դրությամբ վաղ է խոսել ընդհանրապես արտահերթ ընտրությունների մասին: Որպես կանոն, արտահերթ ընտրությունների անցկացման անհրաժեշտություն առաջանում է, երբ իրական ուժերի հարաբերակցությունը էապես տարբերվում է այն հարաբերակցությունից, որն արտահայտում են ուժերը խորհրդարանում: Այսօր այդ իրավիճակն ունենք, իրականում խորհրդարանական փոքր ֆրակցիան անհամեմատ ավելի մեծ հանրային աջակցություն ունի, քան իրականում ուներ, բայց որպես կանոն, արտահերթ խորհրդարանական ընտրություններ անցկացվում են, երբ ուժերի հարաբերակցությունը կայունանում է: Այնպես չի, որ այսօրվա հարաբերակցությունը վաղը, մյուս օրը կմնա նույնը, շատ հնարավոր է, որ տեղաշարժեր լինեն: Հետեւաբար, որոշ ժամանակ անց, երբ կրքերը կհանդարտվեն, երբ իրական ուժերի հարաբերակցությունը կձեւավորվի՝ ազդեցություն, հանրային աջակցություն, այն ժամանակ ռեալ հնարավորություն կլինի խոսել ընտրությունների մասին՝ արտահերթ կամ հերթական: Այս պահի դրությամբ վաղ է խոսել»:
Նա օրինակ բերեց 2013-ին ստեղծված իրավիճակից, երբ «Ժառանգություն» կուսակցությունը նախագահական ընտրություններում երկրորդն էր՝ 540 հազար ձայն էր հավաքել ու ինչ եղավ հետո. «Թվում էր, թե դա ամենաազդեցիկ քաղաքական ուժերից մեկն էր, որը կարող էր դառնալ ՀՀԿ-ի իրական մրցակիցը, բայց մենք ձեզ հետ միասին ականատես եղանք, որ երկու ամիս հետո նա Երեւանի ավագանու ընտրություններում մի կերպ հաղթահարեց ընտրական շեմը: Հետեւաբար իրականում խորհրդարանական ընտրությունները՝ արտահերթ, թե ինչ, կարող են տեղի ունենալ, եթե կա ուժերի հարաբերակցության քիչ թե շատ կայուն իրավիճակ»:
Հռիփսիմե ՋԵԲԵՋՅԱՆ
սա արդէն ամենացածր մակարդակի քաղաքական ըմբռնողութիւն է… նկատի ունենալով որ այժմ գոնէ Ընդդիմութիւն են, օգտակար կը լինի որ ՀՀԿ-ի անունով հանրութեան խօսին անոր երիտասարդ, արդիական անդամները