«Կցանկանայի շեշտել Սերժ Սարգսյանի ապրած կյանքը եւ մատուցած ծառայությունը ՀՀ-ին: Նա ասպետաբար հրաժարական տվեց եւ «ականներ» չթողեց Փաշինյանի եւ ժողովրդի ոտքերի տակ»,-«Հայելի» մամուլի ակումբում այսօր անդրադառնալով ապրիլի 23-ին Սերժ Սարգսյանի՝ ՀՀ վարչապետի պաշտոնից հրաժարականին, ասաց գրող-հրապարակախոս Մերուժան Տեր-Գուլանյանը: «ՀՀ-ն դառնում է ԵՄ անդամ, եւ դա ի շնորհիվ Սերժ Սարգսյանի: Նրա շնորհիվ է, որ այսօր ՀՀ-ն նման իմիջ ունի»,-հավելեց նա:
Ինչ վերաբերում է այս օրերին Երեւանում տեղի ունեցող բողոքի գործողություններին, Տեր-Գուլանյանն ասաց. «Դեմ եմ քաղաքապետարանի շրջափակմանը, երբ նսեմ խոսքերով վարկաբեկում են փայլուն քաղաքապետին՝ նրա երեխաների աչքի առաջ: Անձը վիրավորել չի կարելի: Նա Երեւանը դարձրեց համայն հայության մայրաքաղաք, գեղեցկացրեց, եւ կշարունակի գեղեցկացնել»:
Տեր Գուլանյանը քննադատում է նոր իշխանության պայմաններում շարունակվող բողոքի գործողությունները. «Եթե այդ տրամաբանությամբ շարժվենք, ցանկացած թաղապետի դիմաց կփակեն ու կասեն՝ հեռացիր…Ցանկացած մարդ կարող է փողոց փակել, բայց դա հակաօրինական կդիտվի, քանի որ նոր իշխանություն ունենք: Հարցերը դանդաղ կլուծվեն»:
Հրապարակախոսը դեմ է նաեւ կառավարության բոլոր նախկին պաշտոնյաներին նորերով փոխելուն. «Ժամանակին ՀՀՇ-ն նման կերպ վարվեց, արդյունքը տեսանք: Շատ մարդիկ տարիներ շարունակ ծառայել են հայրենիքին, բայց եթե պաշտոնյա են, դա չի նշանակում, որ պարտադիր պետք է կաշառակեր լինեն»:
Լուիզա ՍՈՒՔԻԱՍՅԱՆ
Ախ եթե «Առավոտ»ը թույլ տար օրհնյալ բերանս բացեի,ախխխխխխխխխխխխխխխխ