«Արդյոք նախարարների նշանակումից հետո նրանց 100 օր «հանգիստ տալը» կարգավորվում է օրենքով», հարցիս մի շարք իրավաբաններ հակասական պատասխաններ տվեցին: Մի քանիսն ասում էին, պետք է պահել լռություն, մի քանիսը ասում էին, թե այդ ժամկետն օրենքով չի կարգավորվում:
Իսկ իրավաբան Արմեն Ղազարյանն ասաց.
-Ոչ, օրենքով այդպիսի կարգավորում չէր կարող լինել, դա քաղաքական ավանդույթ է: Օրենքով այդ շրջանում, որպես կանոն, նորանշանակ ղեկավար պաշտոնյան չպետք է քաղաքացիական հասարակությանն ընդհանուր հարցերով հաշվետվություն ներկայացներ և մամլո ասուլիս տա: Սակայն նույն քաղաքական ավանդույթը պարտավորեցնում է, որպեսզի հրատապ խնդիրներով պաշտոնյան 100 օրվա պատրվակով չխուսափի հրապարակային հայտարարություններից:
Մյուս կողմից, պաշտոնյան չպետք է փորձի բարձրաձայնել այնպիսի լուծումներ, որոնք իր միանձնյա լուծման տիրույթում չեն, առնվազն կարող է հայտարարել, որ կբարձրացնի այդպիսի հարցեր: Որպես կանոն, այդ շրջանում նրանք նաև պետք է արագ պատասխանեն իրենց վերաբերյալ կոռուպցիոն բնույթի հրապարակումներին, ինչը որևէ կապ չունի 100 օրվա պաշտոնավարման հետ:
Ռուզան ՄԻՆԱՍՅԱՆ
