«Մարդիկ պետք է հաշվի առնեն, որ եթե իրականացնում են բողոքի ակցիաներ, կարող են միջամտել այլոց իրավունքներին եւ ազատություններին»,- այսօր լրագրողների հետ զրույցում ասաց ՀՀ արդարադատության նախարար Արտակ Զեյնալյանն՝ անդրադառնալով «Սասնա ծռերի» գործով արդեն երեք օր շարունակվող բողոքի ցույցին, որի արդյունքում փողոցներ են փակվել, իսկ ամբաստանյալների մի մասը պահվում են դատարանում: Չնայած վարչապետ Նիկոլ Փաշինյանի երեկվա հորդորին` ցույցի մասնակիցները ապաշրջափակեցին Արշակունյաց պողոտան, իսկ դատարանի շենքը`ոչ:
Արտակ Զեյնալյանը`վկայակոչելով առաջին նախագահի հարցազրույցը՝ ասաց, թե համամիտ է, որ ամենաթողության մթնոլորտը կարող է կործանել երկիրը. «Յուրաքանչյուրը պետք է հաշիվ տա իրեն եւ իր գործողություններն այնպես անի, որ չվնասի ընդհանուր շահը: Այս հեղափոխությունը բացառիկ հեղափոխություն էր եւ յուրաքանչյուրս պատասխանատու ենք դրա համար: Եթե մեր մտքով ինչ-որ բան է անցել, չպետք է բացառենք, որ դա կարող է հակասել ուրիշների շահերին: Սա պետք է օբյեկտիվ քննություն ստանա»:
Նախարարը խոսեց նաեւ կոռուպցիայի դեմ պայքարի հեռանկարների մասին`պատասխանելով նախկին փորձից ելնելով լրագրողների հարցերին: Ասաց. «Կհաջողե՞նք, թե`չէ, կախված է թե ինչպես կաշխատենք եւ ինչպիսի աջակցություն կստանանք նաեւ ԶԼՄ-ներից»: Հնում եղած չարաշահումները կբացահայտվե՞ն, գումարները կվերադարձվե՞ն`համանման հարցերին նախարարը պատասխանեց`իրավապահները պետք է զբաղվեն. «Գործելու է ոչ թե կոռուպցիայի կանխավարկածը, այլ անմեղության կանխավարկածը: Որեւէ շեղում անմեղության կանխավարկածից եւ արդար դատավարության սկզբունքներից թույլ չի տրվելու»:
Գլխավոր դատախազի փոփոխության մասին էլ ասաց. «Մենք որեւէ գործողություն չենք կատարելու, որը հակասելու է իշխանությունների տարանջատման սկզբունքին»: Նա նկատում է, որ գլխավոր դատախազն ընտրովի է:
Դատական համակարգի առողջացման գործում, ասում է, մեծ դեր ունի Բարձրագույն դատական խորհուրդը: Aravot.am-ի հարցին`խորհրդի անդամների նոր ընտրություններ նախատեսվո՞ւմ են, քանի որ նախորդ ընտրության արդյունքները խորհրդարանում հենց «Ելք» դաշինքի անդամները վիճարկեցին, Արտակ Զեյնալյանը պատասխանեց. «Ես չեմ կիսում ձեր տեսակետը: Դա ձեր տեսակետն է: Հանրությունում այդպիսի տեսակետներ չեմ շոշափել: ԲԴԽ-ն ընտրվել է եւ աշխատում է: Որոշումն ընդունվել է ԱԺ-ի կողմից: Դա ԱԺ-ի կողմից ընդունված որոշում է, այդ թվում դեմ քվեարկածների»:
Անդրադառնալով արտահերթ ընտրությունների հնարավորություններին, նախարարն ասաց, որ իր ղեկավարած գերատեսչությունը դեռ չի սկսել ԸՕ-ի փոփոխությունների վրա աշխատանքը:
Այլ մանրամասները`տեսանյութում
Նելլի ԳՐԻԳՈՐՅԱՆ
