Երեկ կառավարության նիստի ժամանակ ՀՀ վարչապետ Նիկոլ Փաշինյանը հայտարարեց, որ ՀՀ պետական եկամուտների կոմիտեի նախագահ Վարդան Հարությունյանը զբաղեցրած պաշտոնից ազատվելու դիմում է ներկայացրել։ Դրա հիման վրա Հարությունյանը ազատվեց այդ պաշտոնից, եւ ՊԵԿ նախագահ նշանակվեց Դավիթ Անանյանը (նկարում), որը մինչ այդ ՀՀ ֆինանսների փոխնախարարն էր։
Կառավարության ձևավորումից հետո սա թերևս ամենակարևոր որոշումն էր, որը վերաբերվում է տնտեսությանը։ Գործարար շրջանակներում կար որոշակի անորոշություն, որը այս նշանակմամբ էականորեն կցրվի։
Իհարկե, մինչև արտահերթ խորհրդարանական ընտրությունները գործող այս կառավարության առաջնային խնդիրների շարքում ընտրական օրենսգրքում փոփոխություններ կատարելն է, և արտահերթ խորհրդարանական ընտրությունների անցկացումը այնպես, որ դրանց արդյունքների նկատմամբ կասկածներ չլինեն։
Բայց կան նաև տնտեսության ոլորտում իրականացվելիք առաջնային խնդիրներ։ Փաշինյանի ներկայիս կառավարությունը չի ստանձնել սոցիալական վիճակի կտրուկ ու անհապաղ բարելավման խնդիր։ Նման հասարակական ընդգծված պահանջ էլ չկա, որովհետև հասկանալի է, այդ խնդիրը պետք է դրվի ապագա կառավարության առջև, որը կձևավորվի առաջիկա արտահերթ խորհրդարանական ընտրությունների արդյունքում։ Սակայն դա չի նշանակում, թե արդեն գործող կառավարությունը չունի տնտեսական պորտին առնչվող խնդիրների լուծման պարտավորություն։ Եթե փորձենք մի նախադասությամբ բնորոշել այդ խնդիրների շրջանակը, ապա դա թերևս կհնչի այսպես՝ տնտեսության վրա քաղաքական ազդեցության հնարավորինս նվազեցում։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
