ՀՀԿ խմբակցության ղեկավար Վահրամ Բաղդասարյանը`
հետհեղափոխական գործընթացների մասին
– Ի՞նչ տպավորություն ստացաք Հայաստանի նորընտիր վարչապետ Նիկոլ Փաշինյանի` ԵԱՏՄ գագաթնաժողովում ունեցած հանդիպումներից՝ մանավանդ ՌԴ նախագահի հետ հանդիպումից: Ինչպե՞ս եք գնահատում այցի արդյունքները:
– Տեղեկություններ ստացել ենք տարածված լրատվությունից: Համենայնդեպս, պետք է ֆիքսենք հանդիպումն ու առաջին խոսակցությունը եւ սպասենք հետագա աշխատանքին ու գործընթացներին: Այն, ինչ որ խոսվել է, եթե այդ շրջանակներում պահվի նաեւ գործելաոճը, կարծում եմ՝ արտաքին քաղաքական վեկտորում փոփոխություններ չեն լինի:
– Գո՞հ եք այդ հանդիպման արդյունքներից:
– Ես չպետք է գոհ լինեմ, պետք է հանդիպող կողմերը գոհ լինեն: Ես միայն գնահատում եմ պաշտոնական տեղեկությունները: Համենայնդեպս, այլ ակնկալիքներ չկային էլ. ինչ որ սպասում էինք, հանդիպումն այդ տրամաբանության մեջ եղավ: Ամեն դեպքում պետք է սպասենք հետագա գործընթացներին:
– ՌԴ նախագահ Վլադիմիր Պուտինը կարծես մի փոքր լարված էր, Նիկոլ Փաշինյանը` շփոթված. նորմա՞լ էր դա:
– Պուտինի հետ ես որեւիցե մեկ անգամ չեմ հանդիպել, որ նրա լարվածության աստիճանը գնահատեմ: Իսկ Նիկոլ Փաշինյանի շփոթվածությունը կարելի է բացատրել. առաջին անգամ նման ֆորմատով հանդիպում էր ունենում:
– Վերջին օրերին բողոքի ակցիաներ են ընթանում Երեւանի քաղաքապետի, տարբեր համայնքապետերի, դպրոցների տնօրենների դեմ. հեղափոխական այս ալիքի շարունակականությունը ձեզ անհանգստացնո՞ւմ է:
– Ավելի շատ դա իշխանություններին պետք է անհանգստացնի: Այն, ինչ կատարվում է, այն ճանապարհը չէ, ինչի մասին խոսում էին իշխանափոխության մասնակիցները: Դա չէ սահմանադրական ճանապարհը: Ես կողմերին կոչ եմ անում գնալ սահմանադրական ճանապարհով: Եթե մի գյուղի տասը տոկոսը ինչ-որ բան է պահանջում, իշխանությունը չպետք է տուրք տա: Ամեն իրավիճակի համար օրենսդրական լուծումներ կան:
– Արդեն իսկ վերլուծություններ կան, եւ կարծիքներ են հնչում, որ ՀՀԿ-ն դիրքավորվում է եւ ձգտելու է ռեւանշի: Կա՞ նման գործընթաց:
– Մենք որեւէ նման նպատակ չունենք՝ անկախ նրանից, թե անունն ինչ կդնեք, եւ նման խնդիր չունենք: Մենք հավատարիմ ենք մեր որոշումներին եւ հայտարարություններին` պետք է ապահովենք մեր երկրի բնականոն ընթացքը, ԱԺ-ում շարունակենք օրենսդրական աշխատանքը: Բայց պետք չէ թացը չորի հետ խառնել եւ այդ ալիքի վրա անել բաներ, որոնք հակասահմանադրական են: Դա անթույլատրելի է:
– Ինչպե՞ս եք գնահատում կառավարության նշանակումները:
– Կաշխատեն` կտեսնենք:
– Ձեզ չի՞ վախեցնում եւ մտահոգում նախարարների երիտասարդ եւ անփորձ լինելը:
– Իմ մտահոգությունները ես արտահայտել եմ վերջին գործընթացների ժամանակ: Աստված տա, որ աշխատեն այնպես, որ արդարացնեն հանրության սպասելիքները:
– Վարչապետի հետ հանդիպումներ, քննարկումներ եղե՞լ են, ՀՀԿ-ականները գործնականում իրենց փորձով եւ խորհուրդներով կօգնե՞ն երիտասարդ կառավարիչներին, թե՞ միայն չխանգարելով կօգնեք:
– Մենք հանդիպումներ ունեցել ենք, պարոն Փաշինյանն էլ դրանց մասին ասել է, բացառությամբ վերջին օրերի: Եվ ոչ միայն չխանգարելը, այլեւ բոլոր այն խնդիրները, որոնք կառնչվեն մեր երկրի արտաքին խնդիրներին, անվտանգությանը, Արցախի հարցին, այդտեղ մենք պարզապես պարտավոր ենք օժանդակություն ցուցաբերել` անկախ կուսակցական պատկանելությունից եւ քաղաքական հայացքներից:
– Կարծում եք՝ Նիկոլ Փաշինյանին կհաջողվի՞ Արցախը վերադարձնել բանակցությունների սեղանին, ինչի մասին նա հայտարարեց հենց Արցախում:
– Դուք խոսում եք խնդիրների մասին, որոնց պատասխանները ես չէ, որ պետք է տամ: Դա բավական բարդ գործընթաց է: Նախկինում էլ նման նպատակ, ցանկություն եւ ջանքեր եղել են: Եթե հաջողվի, ես կողջունեմ:
– Հայաստանի՝ կոնֆլիկտի կողմ լինել-չլինելու մասին Նիկոլ Փաշինյանի հայտարարությունից հետո բանավեճ ծավալվեց պաշտպանության նախկին նախարար Վիգեն Սարգսյանի, առաջին եւ երկրորդ նախագահների միջեւ: Դուք տեսնո՞ւմ եք վտանգներ այդ հայտարարության մեջ:
– Դա այն մտավախություններից մեկն էր, որոնց մասին ես խոսել եմ:
– Այս հայտարարությունը կարո՞ղ է բանակցային գործընթացի տապալման տանել:
– Օգուտ չի բերելու:
Զրույցը`
ՆԵԼԼԻ ԳՐԻԳՈՐՅԱՆԻ
«Առավոտ»
17.05.2018
