ԱՐՄԵՆ ՇԵԿՈՅԱՆ
ՀԱՅԿԱԿԱՆ ԺԱՄԱՆԱԿ
ԳԻՐՔ ՏԱՍՆԻՆՆԵՐՈՐԴ
Գլուխ տասնութերորդ
ՌԵԺԻՍՈՐՆԵՐԸ
Եվ Հրանտը մի քիչ մտածեց ու Ֆրունզիկին ասաց՝ «Տիգրանը ձեր ֆիլմից բացի՝ մի շարք ուրիշ ֆիլմեր էլ ա փրկել», եւ Ֆրունզիկը մի քիչ մտածեց ու Հրանտին ասաց՝ «մի գլուխ ասում ես՝ ձեր ֆիլմը» եւ մի քիչ էլ մտածեց ու ավելացրեց՝ «էդ ֆիլմը ախպորս՝ Աբոյի ֆիլմն ա» եւ մի քիչ էլ մտածեց ու ասաց՝ «լավի համար էլ ա ինքը պատասխանատու, վատի համար էլ», եւ Հրանտը մի քիչ մտածեց ու Ֆրունզիկին ասաց՝ «չար լեզուներն ասում են, որ էդ ֆիլմը նկարելիս ախպորդ շատ ես օգնել», եւ Փելեշյանը Հրանտին ասաց՝ «էլ ի՞նչ ախպեր, որ ախպորը չօգնի», եւ Ֆրունզիկն ասաց՝ «էնքանով եմ ախպորս օգնել, որ գլխավոր դերն եմ խաղացել» եւ մի քիչ մտածեց ու հարցրեց՝ «կարող ա՞ իրա փոխարեն ռեժիսորություն եմ արել», եւ Հրանտը փռթկացնելով Ֆրունզիկին ասաց՝ «էդ էլ են ասում», եւ Ֆրունզիկը նեղացած ասաց՝ «իմ ականջով էլ ա ընկել» եւ մի քիչ էլ մտածեց ու հարցրեց՝ «ախր, այ Հրանտ ջան, ես ռեժիսորության հետ ի՞նչ կապ ունեմ», եւ Հրանտը Ֆրունզիկին ասաց՝ «էդ խոսակցությունները տարածողներին պիտի ասես», եւ Ֆրունզիկը մի քիչ մտածեց ու ասաց՝ «էդ տարածողների մեծ մասը ռեժիսորներ են» եւ մի քիչ էլ մտածեց ու ավելացրեց՝ «ուզում են ախպորս չարչարանքը ջուրը գցեն», եւ Հրանտը մի քիչ մտածեց ու փռթկացնելով Ֆրունզիկին ասաց՝ «ա՛յ խելոք, ախպորդ չարչարանքը ոչ թե ջուրն են գցում, այլ քեզ վրա են գցում», եւ Ֆրունզիկը մի քիչ մտածեց ու Փելեշյանին ասաց՝ «ինձ թվում էր՝ ամենից շատ դերասաններն են իրար նախանձում, բայց պարզվում ա՝ ձեր ռեժիսորներն ավելի բեթար են», եւ Փելեշյանը մի քիչ մտածեց ու ժպտալով Ֆրունզիկին ասաց՝ «դրանք ձե՛ր ռեժիսորներն են, Ֆրունզ ջան», եւ Հրանտը փռթկացնելով Ֆրունզիկին ասաց՝ «դրանք էնքան ապուշ են, որ փոխանակ քեզ նախանձեն, ախպորդ են նախանձում», եւ Ֆրունզիկը մի քիչ մտածեց ու փռթկացնելով Հրանտին ասաց՝ «պայմանավորվեցինք, որ Աղասուց ենք բամբասելու, բայց նստել՝ հարազատ ախպորս ենք բամբասում», եւ Հրանտը մի քիչ մտածեց ու ժպտալով Ֆրունզիկին ասաց՝ «որովհետեւ թիֆլիսեցիներից վախենում ենք», եւ Ֆրունզիկը Հրանտին հարցրեց՝ «ինչի՞ ենք վախենում», եւ Հրանտը պատասխանեց ու ասաց՝ «որովհետեւ թիֆլիսեցիք ձեզնից ավելի հիշաչար են», եւ Փելեշյանը Հրանտին հարցրեց՝ «էլի Մալյանի բախչեն ե՞ս քար գցում», եւ Հրանտը մի քիչ մտածեց ու ասաց՝ «Մալյանը վայ թե ամենաանհիշաչար թիֆլիսեցին ա» եւ մի քիչ էլ մտածեց ու փռթկացնելով ավելացրեց՝ «Սայաթ-Նովային չհաշված», եւ Ֆրունզիկը զարմացած նայեց Հրանտին ու հարցրեց՝ «Սայաթ-Նովա՞ն ինչ կապ ունի», եւ Փելեշյանը ժպտալով Ֆրունզիկին ասաց՝ «հանաք ա անում» եւ մի քիչ մտածեց ու ժպտալով ավելացրեց՝ «էրեւում ա՝ Հրանտի ոճին ծանոթ չես»:
Շարունակությունը՝ հաջորդ ուրբաթ:
