ԱԺ արտաքին հարաբերությունների հանձնաժողովի նախագահ, ՀՀԿ փոխնախագահ Արմեն Աշոտյանն այսօր ստեղծված իրավիճակում Հայաստանում 3 խնդիր է տեսնում. «Ես կառանձնացնեմ 3 ռիսկային սցենարներ, որոնցից յուրաքանչյուրից պետք է խուսափել: Վստահ եմ, որ ՀՀԿ-ի ներուժը, այդ թվում՝ ԱԺ-ում, հերիքելու է, որպեսզի մենք կարողանանք կյանքի կոչել այն հնարավորությունները, որ մենք ունենք: Առաջին վտանգը, որը ես տեսնում եմ երկրում, կարծես թե կիսում են գործող իշխանությունները, դա անարխիան է, քաոսն է, այդ վտանգը գոյություն ունի: Երկրորդ վտանգը չափից ավելի մեծ ավտորիտար ճանապարհով գնալու, գերկարգավորումների դաշտով քաղաքական այլախոհությունը սահմանափակելու կամ ճնշելու վտանգն է, այսինքն, ավտորիտար ճանապարհը նույնպես ռիսկային եմ դիտարկում այսօր: Երրորդ վտանգը պոպուլիզմի այն վտանգավոր աստիճանն է, որը կարող է պարզապես էրոզիայի ենթարկել պետական մարմինների գործողությունները եւ պետական քաղաքականությունը»:
Հարցին՝ որտե՞ղ եք տեսնում ավտորիտար ճանապարհով գնալու վտանգը՝ Աշոտյանը պատասխանեց՝ հանրային, քաղաքական քննարկումների դիսկուրսում, կա այլ կարծիքների նկատմամբ անհանդուրժողականություն, որոնք չեն համընկնում գործող ղեկավարի կարծիքի հետ:
Թե պոպուլիզմ որտե՞ղ է տեսել՝ Աշոտյանը պատասխանեց. «Ես վտանգն եմ տեսել»:
Հարցին՝ անարխիա՞ն որտեղ եք տեսել՝ Արմեն Աշոտյանը պատասխանեց. «Անարխիայի եւ քաոսի հետ կապված այսօրվա եւ երեկվա ակցիաներն են»:
Նա ասաց, որ այս 3 վտանգը իր քաղաքական կանխատեսումն է, կցանկանար սխալված լինել:
Մանրամասները՝ տեսանյութում:
Հռիփսիմե ՋԵԲԵՋՅԱՆ
