Պատասխանելով Aravot.am-ի հարցին` ԿԳ նախարար Արայիկ Հարությունյանը, որ «Դեմ ենք օտարալեզու դպրոցների բացմանը» նախաձեռնության ակունքներում է եղել, ասաց, որ շարունակելու են պայքարը դպրոցներում օտարամոլության բացառման առումով. «Սկզբունքը դպրոցներում` օտար լեզուների հետ կապված, լինելու է ոչ թե օտարալեզու դպրոցներ բացելը, այլ լեզուների՝ պատշաճ կերպով դասավանդելը: Օտարալեզու դպրոցները այստեղ հարց չեն լուծում»:
Քանի որ Արայիկ Հարությունյանը 11 տարի դասավանդել է Երեւանի պետական համալսարանում, նրանից հետաքրքրվեցինք` չի՞ ափսոսում, որ այլեւս չի դասավանդելու: «Ո՞վ է ասում՝ չեմ դասավանդելու, ԵՊՀ-ն լինելու է վերջին տեղը, որտեղից դուրս կգամ»,-ասաց նախարարը:
Գիտության ոլորտի վերաբերյալ խոսելիս, նախարարը նշեց, որ այն օրենքներն ու կարգավորումները, որ կան, բավականին լավն են, ուղղակի պետք է մտածել հատկացվող միջոցների արդյունավետ ծախսման եւ արդյունքների գնահատման մասին: «ԿԳ նախարարությունն ունի համապատասխան կառույցներ, որոնք գնահատման առումով լավ չեն աշխատել»,-ասաց ԿԳ նախարարը:
Ինչ վերաբերում է կրթության ոլորտի ֆինանսավորմանը, այս մասին էլ հայտնեց. «Մենք բոլոր հնարավորությունները ստեղծելու ենք, որ որեւէ գիտնական չմտածի Հայաստանից արտագաղթելու մասին: Ներկայում կրթական ոլորտում կան բավարար գումարներ, որոնք պետք է ճիշտ բաշխվեն: Նաեւ մեր ռազմավարական նպատակներից է ավելացնել գումարները: Օրենքով սահմանված էր, որ կրթությանը ՀՆԱ-ի 4%-ը պետք է հատկացվի, մինչդեռ Կարեն Կարապետյանի, Սերժ Սարգսյանի կառավարությունը այդ թիվը նվազեցրեց` խախտելով օրենքը»:
Գոհար ՀԱԿՈԲՅԱՆ
