Գազայի հատվածում տեղի ունեցած դեպքերից հետո Թուրքիայի և Իսրայելի միջև հարաբերությունների լարման ֆոնին Իսրայելի Քնեսետում կրկին հայտնվել է Հայոց ցեղասպանությունը ճանաչող օրինագիծն ընդունելու հարցը:
Jerusalem Post-ի հաղորդմամբ՝ պատգամավորներ Իցիկ Շմուլին և Ամիր Օհանան հայտարարել են, որ ներկայացնելու են Օսմանյան կայսրությունում շուրջ 1.5 միլիոն հայերի սպանությունը որպես ցեղասպանություն ճանաչող օրինագիծ, որով Իսրայելը կդառնա Հայոց ցեղասպանությունը պաշտոնապես ճանաչած աշխարհի 30-րդ պետությունը:
Հայոց ցեղասպանությունը ճանաչելու հարցն Իսրայելում կրկին արծարծել են այն բանից հետո, երբ Թուրքիայի նախագահ Ռեջեփ Թայիփ Էրդողանը ահաբեկչական պետություն է անվանել Իսրայելը՝ քննադատելով Գազայի հատվածում Իսրայելի ձեռնարկած գործողությունները: Բացի այդ Անկարան նաև հետ է կանչել Թել Ավիվում իր դեսպանին: Ի պատասխան՝ Իսրայելի վարչապետ Բենիամին Նեթանյահուն Թուրքիային մեղադրել է ՀԱՄԱՍ-ին աջակցելու համար:
«Մենք բարոյական դասեր չենք ընդունի հակասեմական թուրք մսագործից, որը Սիրիայի հյուսիս-արևմուտքում ռմբակոծում է հազարավոր քրդերի, և որի երկիրը պատասխանատու է հայ ժողովրդի ցեղասպանության և ասորիների դեմ գործած պատմական սարսափների համար»,-ասել է Շմուլին:
Իսրայելցի պատգամավորը նաև նշել է, որ Իսրայելը պետք է վաղուց ճանաչած լիներ Հայոց ցեղասպանությունը:
Օհանան իր հերթին ընդգծել է, որ դիվանագիտական գործոններով պայմանավորված՝ ցեղասպանության ճանաչումից հրաժարվելն արդեն վաղուց ժամանակավրեպ է, և ժամանակն է արդարություն հաստատել:
Jerusalem Post-ի դիվանագիտական աղբյուրի հաղորդմամբ՝ ցեղասպանությունը ճանաչելու վերաբերյալ վերջնական որոշումը կկայացնի վարչապետ Բենիամին Նեթանյահուն: Իսրայելի արտգործնախարարությունը հրաժարվել է մեկնաբանություններից:
Հիշեցնենք, որ 2017թ. փետրվարին Հայոց ցեղասպանությունը ճանաչող բանաձև ներկայացրել էր «Յեշ Աթիդ» կուսակցության առաջնորդ Յաիր Լապիդը, որը, սակայն, քվեարկության արդյունքում մերժվել էր:
Պատրաստեց՝ ՎԻԿՏՈՐՅԱ ԱՆԴՐԵԱՍՅԱՆԸ
