Այսօր դատավոր Արտուշ Գաբրիելյանի նախագահությամբ «Սասնա ծռեր» խմբի անդամների մի մասի գործով հերթական դատական նիստն էր: Ամբաստանյալներին, սակայն, դատարան չէին ներկայացրել , քանի որ ոստիկանության ուղեկցող գումարտակը երեկվանից շրջափակման մեջ է մնացել Երեւանի ընդհանուր իրավասության դատարանի Շենգավիթի նստավայրում:
Հիշեցնենք, որ դատարանի դիմաց՝ Արշակունյաց պողոտայում, «Սասնա ծռերի» աջակիցները նստացույց են անում քաղբանտարկյալներին ազատ արձակելու պահանջով:
Այսօր պաշտպանները դժգոհեցին, որ դատավորը պատրաստակամությունը չի ցուցաբերում ճշտելու համար, թե արդյոք հնարավոր չէ՞ ամբաստանյալների ներկայությունն ապահովել: Իսկ Արտուշ Գաբրիելյանը պնդեց, որ ուղեկցող գումարտակի բացակայության պայմաններում դա հնարավոր չէ:
Նիստի ավարտին էլ պաշտպանները նկատեցին, որ դատարանի բակ մտավ ոստիկանության ուղեկցող գումարտակի մեկ ավտոմեքենա եւ հայտարարեցին, որ փաստորեն հնարավոր էր ապահովել ամբաստանյալների ներկայությունը:
Լուիզա ՍՈՒՔԻԱՍՅԱՆ
