Մայիսի 17-ին Հայաստանի գիտությունների ակադեմիայում բացվեց ճանաչված հայագետ-կովկասագետ Պավել Չոբանյանի ծննդյան 70-ամյակին նվիրված գիտաժողով, որը կրում է «Հայաստանը եւ արեւելաքրիստոնեական քաղաքակրթությունը» խորագիրը: Արդեն երրորդ անգամ անցկացվող այս միջոցառմանը մասնակցում են ինչպես Հայաստանի, այնպես էլ տարածաշրջանի այլ երկրներից, ՌԴ-ից եւ Հունաստանից հրավիրված գիտնականներ, ավելի քան 40 զեկուցողներ:
Զեկուցումները վերաբերվում են հայ-վրացական, հայ-աղվանական քաղաքական եւ պատմամշակութային առնչություններին, հայ-ռուսական քաղաքական եւ մշակութային առնչություններին` միջնադարում, արեւելյան աղբյուրագիտությանը, քրիստոնյա Երուսաղեմին, արդի Կովկասին:
Չոբանյանին պրոֆեսորները բնորոշեցին որպես լավ մարդ եւ բծախնդիր գիտնական, նաեւ բացառիկ հետազոտող: Մտերիմներից մեկը գիտնականի մասին խոսելիս, ասաց, որ նա մշտապես պահում էր ցանկացած խոստում, սրճամոլ ու ծխախոտամոլ էր, նաեւ գրքամոլ, հետաքրքրությունների լայն շրջանակ ունեցող անհատականություն:
Գիտնական հայրիկի մասին հուզիչ խոսք ասաց նրա դուստրը` Հայկանուշ Չոբանյանը: Նա Պավել Չոբանյանին համեմատեց սահմանը պահող զինվորի հետ, ասելով, որ հայրն էլ գրչով էր պայքարում ադրբեջանցիների կողմից հայոց պատմության նենգափոխման դեմ: Հայկանուշ Չոբանյանը հայտնեց, որ անպայման կհրատարակվեն հոր անտիպ գիտական աշխատություններից որոշները:
Հայկանուշ Չոբանյանի ելույթի մանրամասները` տեսանյութերում:
Հավելենք, որ Պավել Չոբանյանը 2013-ից եղել է ՀՀ ԳԱԱ «Բանբեր հայագիտության» միջազգային գիտական հանդեսի գլխավոր խմբագիրը, վարել է բեղմնավոր գիտամանկավարժական աշխատանք պատրաստելով բազմաթիվ հայագետ, կովկասագետ մասնագետների, որոնք շարունակում են դասական արեւելագիտության ավանդները ակադեմիական եւ համալսարանական գիտական հաստատություններում:
Գիտաժողովն աշխատանքները կշարունակի նաեւ մայիսի 18-ին:
Գոհար ՀԱԿՈԲՅԱՆ
