Վարչապետ Նիկոլ Փաշինյանը կառավարության նիստից առաջ հանդիպեց կառավարության շենքի մոտ հավաքված բողոքի ցույցեր անողներին: Հավաքվածների խնդիրները տարբեր էին, սակայն հիմնականում սոցիալական բնույթի՝ երեխային մանկապարտեզ չեն ընդունում, նպաստ չեն կարողանում ստանալ, որովհետեւ հաշվառում չունեն եւ այլն, եղան նաեւ շնորհավորանքներ:
Անդրադառնալով վերջին օրերին տեղի ունեցող գործադուլներին ու բողոքի ակցիաներին, Նիկոլ Փաշինյանը լրագրողների հետ զրույցում ասաց. «Բոլորս պաուզայի կարիք ունենք, որպեսզի հանգիստ պայմաններում հարցերը դասավորենք և հերթով զբաղվենք դրանց լուծմամբ: Իհարկե, այս տեսարանն անընդհատ եղել է, բոլոր կառավարության նիստերին: Մյուս ակցիաները էլի ժամանակ առ ժամանակ եղել են, բայց մենք գիտենք նաև, որ ճնշումների մեխանիզմների գործադրմամբ շատ տեղերում զսպվել են և փակվել են այդ ակցիաները: Հիմա, բնականաբար, այդ ճնշումների մեխանիզմները չկան, և մարդիկ ազատ արտահայտվելու իրենց հնարավորությունից օգտվում են: Մարդիկ պետք է հասկանան, որ բոլոր հարցերը միանգամից լուծելու տրամաբանություն չի կարող գործել, որովհետև եթե մենք բոլոր հարցերը միանգամից փորձենք լուծենք, բոլոր հարցերի լուծումը միանգամից կձախողենք»:
Նելլի ԲԱԲԱՅԱՆ
