Առաջիկայում ականատեսն ու մասնակիցն ենք լինելու մի նախընտրական քարոզարշավի, որի մեկնարկը տրված է, իսկ վերջը հայտնի չէ. «Ժամանակ»

Հայաստանում բոլորը պատրաստվում են արտահերթ խորհրդարանական ընտրությունների, իսկ դա նշանակում է, որ քաղաքական ուժերը փորձելու են հնարավոր բոլոր մեթոդներով շահել հանրության համակրանքը: Քաղաքական ուժերը իրար հետ մրցակցության մեջ են մտնելու՝ համոզելու համար հանրությանը, որ իրենք ավելի մտահոգ են հանրության տարբեր շերտերի իրավունքների պաշտպանությամբ, և միայն իրենց հաղթանակի դեպքում է, որ մարդիկ կունենան ավելի շատ բարեկեցություն՝ ավելի քիչ կվճարեն և ավելի շատ կվարձատրվեն:

Առաջիկայում մենք ականատեսն ու մասնակիցն ենք լինելու մի  նախընտրական քարոզարշավի, որի մեկնարկը տրված է, իսկ վերջը հայտնի չէ, քանի դեռ որոշված չէ արտահերթ ընտրությունների անցկացման օրը:

Առաջին քայլն արել է ՀՀԿ խմբակցությունը, երբ խմբակցության պատգամավորներ Արփինե Հովհաննիսյանը, Գևորգ Կոստանյանը, Վահրամ Բաղդասարյանը և Անդրանիկ Հարությունյանը խորհրդարան ներկայացրեցին Ոստիկանության մասին օրենքում փոփոխություն կատարելու մասին օրենքի նախագիծ: Այս նախագծով արգելվում է շարժական արագաչափերի կիրառումը: Շարժական արագաչափերի կիրառման մասին Ճանապարհային ոստիկանությունը հայտարարեց այս տարվա փետրվարի 8-ին, և հիմնավորումն այն էր, որ արագության գերազանցման հետևանքով վթարների թիվն ավելանում է, և ավելանում է դրանց հետևանքով զոհերի թիվը: Փետրվարի 8-ին ՀՀԿ-ն իշխանություն էր, և ՀՀԿ-ական պատգամավորները այն ժամանակ չէին համարում, որ տվյալ սարքերի կիրառումը քաղաքացու անձնական տվյալների պաշտպանության խախտում է: Հիմա նրանք հենց դրանով են բացատրում նման սարքերի կիրառման անթույլատրելիությունը:

Իրականում ՀՀԿ-ական պատգամավորներն ուզում են շահել այն մարդկանց համակրանքը, որոնք ահաբեկված էին շարժական տեսանկարահանող սարքերի գործարկմամբ: Դժվար է ասել՝ այդ սարքերն իրականում կիրառվեցի՞ն, թե՞ ոչ, և դրանց միջոցով արձանագրված խախտումների հիման վրա կազմվեցի՞ն վարչական իրավախախտման մասին արձանագրություններ, բայց փաստն այն է, որ ՀՀԿ խմբակցությանը այլևս չի հետաքրքրում աճող զոհերի վիճակագրությունը, նրանք արտահերթ ընտրություններում չեն կարողանալու քվեարկել, նրանց հետաքրքրում են ավտոմեքենաների ողջ տերերի քվեները, որոնք չեն ուզում տուգանվել:

Ավետիս Բաբաջանյան

Հոդվածն ամբողջությամբ կարող եք կարդալ «Ժամանակ» թերթի այսօրվա համարում