Աշխարհաքաղաքական ի՞նչ կուրս է վերցրել Հայաստանում թավշյա հեղափոխության արդյունքում ձեւավորված իշխանությունը, միջազգային հանրությունն ի՞նչ ակնկալիքներ ունի Նիկոլ Փաշինյանի ղեկավարած գործադիր իշխանությունից, երիտասարդ, հեղափոխական վարչապետի հայտարարություններից, Սոչի կատարած այցից։
Մանվել Սարգսյանը վաղ է համարում խոսել նման հարցերի մասին մի պարզ պատճառով․ «Մենք անընդհատ մոռանում ենք, որ գործ ունենք ժամանակավոր կառավարության հետ, որն ունի բացառապես մեկ գործառույթ՝ կազմակերպել արտահերթ ընտրություններ, մնացյալն ընթացիկ խնդիրներ են։ Նիկոլ Փաշինյանն ի՞նչ գործ ունի ղարաբաղյան խնդրի վերաբերյալ կոնցեպտ ձեւակերպի, չգիտեմ ինչ անի։ Երբ կլինեն ընտրություններ, հաղթող ուժ կլինեն, կանեն նման բան։ Ժողովուրդն իրեն մանդատ չի տվել, որ գնա ղարաբաղյան հարցով բան անի»։
Դիտարկմանը, որ ժողովուրդն է Փաշինյանին վարչապետի մանդատ տվել, Սարգսյանը համաձայնեց, բայցեւ պնդեց, որ Փաշինյանը մանդատավորված չէ ղարաբաղյան խնդրով կոնցեպտ ձեւակերպելու եւ, առհասարակ, արտաքին քաղաքականություն որոշելու։
Քաղաքագետն ընդունում է, որ Փաշինյանը դիրքորոշում հայտնելու իրավունք ունի, բայց դրանք չի կարելի ընդունել իբրեւ քաղաքական կուրս․ «Հիմա թե ինչպես է ընդունում այս իրողությունը, դա արդեն ուրիշ խնդիր է, իրենք ընդունել են, գնահատականներ տվել եւ այլն, բայց մենք այստեղ այլ խնդիր ունենք, նախեւառաջ արտահերթ ընտրություններ հրավիրել, իսկ այս ամենն ուղղակի ընթացիկ է»։
Լուսինե ՇԱՀՎԵՐԴՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում
