Մայիսի 16-ին Երեւանի քաղաքապետարանի շենքի դիմաց Երեւանի քաղաքապետ Մարգարյանը պատասխանեց լրագրողների հարցերին, այդ ընթացքում նրա աջակիցները վանկարկում էին «Տարոն Մարգարյան», «Տարոնը մերն է», իսկ խզված ձայնով մի կին անընդհատ գոռում էր. «Մեռնեմ համեստ ջանիդ»:
Քաղաքապետի աջակիցները կոչերի բովանդակությամբ պաստառներ էլ ունեին:
Տարոն Մարգարյանն ասաց, որ ցույցի ժամանակ ինքն աշխատանքային այցով մեկ այլ վարչական շրջանում է եղել, դրա համար ներկա չի գտնվել քաղաքապետարանում. «Դրանից հետո փորձեցի շատ արագ միանալ լսելու քաղաքացիների դժգոհությունը եւ իմ կողմնակիցներին, որոնք էլ իրենց պահանջն են ներկայացնում, ես հարգում եմ երեւանցիների խոսքը, բոլոր խնդիրները հաշվի կառնենք»:
Նա անդրադարձավ ցուցարարների` քաղաքապետարան մտնելուն. «Ես դատապարտում եմ, հստակ երեւում է, որ օրենքի խախտում է եղել, ակտիվիստները ներխուժել են քաղաքապետարանի շենք եւ փորձել են քաղաքապետարանի աշխատանքի բնականոն հունը խաթարել: Կոչ եմ անում իրավապահներին զբաղվել այս հարցով: Որպես տեղական ինքնակառավարման մարմին, մենք անկախ ենք, մեր աշխատանքները եւ մեր ծագրերն իրականացնում ենք, եւ նման անօրինականությունները չենք հանդուրժի»,-ասաց քաղաքապետը:
Այգու բարեկարգման վերաբերյալ աղմուկի մասին խոսելիս, Տարոն Մարգարյանը հավելեց. «Դեռ տասը տարի առաջ այգին տրված էր վարձակալության, շնորհակալ ենք, որ նախկին վարձակալը այն հետ վերցրեց, եւ Վարդանյանների ընտանիքը բարեկարգման աշխատանքներ է իրականացնում… 2800-ամյակին այգին նվիրելու էլ Երեւանին: Վարդանյանների ընտանիքը խոստացել է, որ սրճարան եւ առեւտրային հատված չի լինելու, այգին համայնքինն, Երեւանինն է: Ինչ վերաբերում է ծառերի հատմանը, որոշակի հատումներ եղել են, կան մասնագիտական եզրակացություններ, սակայն կանաչ տարածքն ավելացվելու է, ավելի շատ ծառեր են տնկելու…»:
Իր հրաժարականի պահանջի մասին էլ Տարոն Մարգարյանն ասաց. «Ամբողջ աշխարհում ընդունված չէ, երբ որ մի քաղաքական ուժ գալիս է իշխանության եւ փորձի ճնշել տեղական ինքնակառավարման մարմիններին, ընտրովի մարմիններին»:
Գոհար ՀԱԿՈԲՅԱՆ
